'Hemen bukatu da nere garaia'

"Hemen amaitu da nere garaia. Milesker burkideok. Hemen naiz, zuekin". Hitz hauek eman diote amaiera diskurtsoari. Ondoren, bi minutuko txalo zaparrada. Alderdi Sozialistaren Sevillako Kongresua jarraitzen ari diren ia mila kideek altxatuta eskaini diote azken agurra Zapaterori. Gidoia betez, emozio askorako tarterik gabe, lidergoari agur esango dion buruzagiak ez du amaiera mingotsik izan agurrean.

Aurretik, krisiaren arrazoiak azaltzen ahalegindu den diskurtsua entzun behar izan dute. Tesi nagusia, mundu mailako krisiak Espainia aurretik eraman duela izan da. Ameriketako Estatu Batuetako krisi finantzieroan jarri du abiapuntua presidente ohiak, eta ondorioz, domino fitxak bailiran, atzetik etorri zirela gainontzeko guztiak. Autokritika egin du, halere: krisia atzematen berandutu egin zela onartu du Zapaterok, baina horren aurrean hartutako neurriak etzirela inprobisazioa izan gaineratu du. Bere erabaki guztiak Espainia "interbenitua izan etzedin" hartu zituela azpimarratu du.

Bere testamendu politikoa uzten ari zenaren jakitun, Espainiako Gobernuan egindako lorpenak azpimarratu ditu: hezkuntzan, berdintasunaren bidean, ongizate estatuaren defentsan... Eta alderdiaren etorkizuna sozialdemokraziaren oinarrietan sakontzearen bidetik etorriko dela argi utzi nahi izan du,hori bai, egungo gizarte aldaketara egokituz.

ETAren amaiera

ETAren indarkeriaren gaia Isaias Carrasco, duela lau urte ETAk erahil zuen Arrasateko zinegotzia, gogoratuz hasi du. "Akaso, ETAk hil zuen azken alderdikidea", iradoki du. Emozio unea izan da Zapaterorentzat eta, bide batez, euskal sozialistek bakebidean egindako lana goraipatu du, txaloen artean.

"Intentsoena, baina aberatsena, aldi berean, Euskadiko alderdikideek nola eutsi duten ikustea izan da", onartu du.

Amaieran, bi minutuko txalo zaparrada eskaini diote Zapaterori alderdikideek. Berak, esker onez, eskua bihotzera eramanaz, esan die agur.