Itxi

2021/08/31

14:03

Politika

Gobernu Kontseilua

Lehendakariak autogobernua "garatu eta gaurkotzearen" alde egin du

O.P. | EITB MEDIA

Iñigo Urkulluk Autonomia Estatutua osorik betetzea defendatu du, eta estatus berri baten alde lan egiteko eskatu die Legebiltzarreko taldeei. Era berean, emateko dauden eskumenen transferentzien kronograma beteko den itxaropena agertu du.

2:35
Iñigo Urkullu
  • Whatsapp
  • Whatsapp
  • Telegram
  • Bidali

Iñigo Urkullu lehendakariak autogobernuaren defentsa eta Autonomia Estatutua osorik betetzea aldarrikatu du, baita "eskumenen higadurari" aurre egitea ere "autogobernua defendatuz eta hartan sakonduz, egueneratze bat oinarri hartuta".

Hala adierazi du Donostiako Miramar jauregian lehen Gobernu Kontseiluaren ostean emandako prentsaurrekoan, Euskal Autonomia Erkidegoan adosteko dagoen estatus berriari buruz galdetu diotenean.

Bere ustez, Autonomia Estatutua onartu eta 41 urtera, eta "testuinguru politiko guztiz ezberdin batean, gizarte erabat ezberdin baten aurrean", autogobernu aitortuak "gaurkotzea eta sakontzea merezi du".

Hala ere, gogorarazi du Legebiltzarreko taldeei dagokiela "akordio zabal baten alde lan egitea, estatus berri baten inguruko adostasuna oinarri hartuta".

Eskualdatu gabe dauden eskumenak ere izan ditu hizpide Urkullu lehendakariak bere hitzaldian. Pedro Sanchezen Gobernuak onartutako kronograma beteko den itxaropena agertu du, eta falta diren bederatzi eskumenak laster transferituko direla uste du. Itxaropen horri eusten dio, are gehiago Olatz Garamendi Gobernantza Publiko eta autogobernuko sailburuaren eta Isabel Rodriguez Garcia Lurralde Politikako ministro berriaren artean "komunikazio hari zuzena" dagoenean.

Errespetuaren garrantzia

Iñigo Urkullu lehendakariak, Eusko Jaurlaritzaren izenean, joan den igandean Plentzian 17 urteko neskato batek jasandako "sexu-eraso basatia" arbuiatu du, adingabeari eta haren familiari "hurbiltasuna" helarazi die eta Ertzaintza "egileak identifikatzeko eta atxilotzeko" lanean ari dela ohartarazi du.

"Emakumeen aurkako erasoak salatzeko deitzen diren gaitzespen ekintza guztiekin bat egiten dugu, eta berdintasunaren aldeko konpromiso irmoa adierazten dugu", adierazi du lehendakariak.

Era berean, azken asteburuetako istiluak gaitzetsi ditu, eta esparru guztietan autoritatearekiko errespetuaren balioaren garrantzia aldarrikatu du, familiatik eta hezkuntzatik abiatuta, erkidegoan eta beste leku batzuetan, covid-19aren aurkako neurriak betetzearen testuinguruan izandako istiluen arazoari aurre egiteko giltzarri gisa.

Adierazi duenez, administrazioek gazteen heziketaren ardura dute 16 urte bete arte eta gobernua "bizikidetzaren printzipio etikoa, konpromisoa, ahalegina eta erantzukizunaren printzipioak oinarri hartuta" egiten saiatzen da prozesu hori. Hala ere, azpimarratu du balio horiek finkatzea familian abiatu behar dela, hezkuntza eremutik baino lehen.

Arnaldo Otegi EH Bilduko buruaren argudioak errefusatu ditu; Otegik adierazi zuen istilu horiek "neoliberalismoak inposatutako aisialdi ereduaren" testuinguruan ulertu behar zirela. Bada, Urkulluk erantzu dio, istiluak sortzen dituztenen jokabideak ez duela zerikusirik ideologiekin, "balioekin" baizik.

"Hori gazteen aisialdi-eredutik harago doa, autoritatearekiko errespetu-sentimenduan eragiten duten balioez ari gara, hezkuntzatik bertatik hasita. Merezi du irakasleei autoritate gisa duten boterea ezeztatzen zaien moduaz hausnartzea", esan du Urkulluk. Otegirena bezalako gogoetak, lehendakariak azaldu duenez, "jarrera bortitzak ezkutatzen edo justifikatzen saiatzen dira, eredu ideologiko edo sozial jakin baten kausa dela esanez".

Adierazi duenez, Eusko Jaurlaritzak ez du euskal gazteria "estigmatizatu"; izan ere, % 75 "ekintza horien aurka dago argi eta garbi", eta euskal gazteen balio positiboak goraipatzearen alde agertu da.

Ertzaintzari babesa adierazi dio, "proportzionaltasunaren zentzuz" jokatu duelako, eta ukatu egin du istiluak baliabide faltagatik larriagotu izana; izan ere, beste Polizia batzuk antzeko egoerei aurre egin behar diete beste erkidego eta herrialde batzuetan.

Ongietorrien inguruko eskaria

Lehendakariari galdetu diote, halaber, Santutxuko preso bati egindako harreraren ondoren sortutako eztabaidaren inguruan duen iritziaz. Argitu duenez, "Auzitegi Nazionalaren babesa duten ekitaldiak dira", baina Eusko Jaurlaritzaren iritziz, "ez lirateke antolatu behar, gutxiago grabatu, eta are gutxiago zabaldu". Bere ustez, "halako jarrerekin, Eusko Legebiltzarrak errefusatu zuen zerbait berpiztu da", eta, hori dela eta, "bereziki EH Bilduri" eskatu dio lehenik eta behin "biktimen sentimendua entzuteko, eta ondoren, Eusko Legebiltzarrean ordezkatuta dagoen euskal gizartearen gehiengoaren sentimendua entzuteko".

Koronabirusa

Urkulluk adierazi duenez, Euskadik bosgarren uhin pandemikoa menderatzea lortu du, baina, egungo agertokia hobea izan arren, "errealismo, konpromiso eta erantzukizun jarrera berari eutsi behar diogu", birusaren aurkako borroka irabazi ahal izateko, erantsi du.

  • Bisitatuena

      Kargatzen ikusiena
      Kargatzen ikusiena
    ;