Jaurlaritzak Gogora Institutuaren erakusketa gunea aurkeztu du

Gogora Memoriaren, Bizikidetzaren eta Giza Eskubideen Institutuak "Gogoak Hedatuz" izeneko espazio berriaren proiektu arkitektonikoa aurkeztu du, Euskadiko memoriaren txoko "berezi eta erreferentziazkoa", Beatriz Artolazabal Berdintasun, Justizia eta Gizarte politiketako sailburuaren arabera.

Proiektu irabazlearen aurkezpena ostegun honetan egin da erakundeak Bilbon duen egoitzan, eta berdintasun eta Gizarte politiketako sailburuarekin batera, Gogora Institutuko arduradunek parte hartu dute.

Artolazabalek zehaztu duenez, "bisitatzeko eta ibiltzeko, baina, batez ere, sentitzeko, hunkitzeko eta gogoeta egiteko" gune bat izango da, "berriro gerta ez dadin, gogoratu egin behar delako", erantsi du.

Bilbon, Gogora institutuaren bulegoak dauden eraikineko patioan gauzatuko da erakusketa gunea, eta 2023ko udaberrian zabalduko ditu ateak.

Artolazabalen arabera, Gasteizko Biktimen Oroimenerako Zentroarekin eta Gernikako Bakearen eta Bonbardaketaren Museo berri batekin sarean lan egingo du eremu berri honek.

Eraikin arina eta kentzeko erraza

Erakusketa sei azpieremutan dago egituratuta: ETAren terrorismoaren memoria; eskuin muturraren terrorismoaren memoria; nagusikeriari eta indarkeria zilegi ez den moduan erabiltzeari buruzko memoria; eta bidegabekeriei aurka egiteko erresistentzia demokratikoaren memoria.

Federico Soriano arkitekto handiak zuzenduko du proiektua, Boslan Ingenieria y Consultoria eta Alaiki Zerbitzu Gizakulturalak euskal enpresekin eta Madrilgo Imandra Project (2021eko Europako Museo Onenaren sariko finalista) enpresekin lankidetzan.

Patioan har daitekeen azalera 350 metro koadrokoa da gehienez, eta diseinu irabazleak patioaren bolumena eta zuhaiztia barne hartzen ditu, eta eraikinaren atondoarekin lotzen du. Espazio hori sarbide zaila duen patio baten barruan eraikitzea da erronka, eta horretarako material arinak eta desmuntagarriak erabili dituzte, Sorianok azaldu duenez.

Arkitektoak nabarmendu duenez, ez dute museo bat "zentzu hertsian" asmatu nahi izan, baizik eta helburua "emozioak eta sentsazioak sortzea, memoria fisikoa sortzea, argien, itzalen, materialen... bidez, eta egun dauden zuhaitzak integratzea eta hausnarketarako gune bihurtzea" izan dela.