Josu Urrutikoetxea epaituko dute Zaragozako kuartelaren aurkako erasoagatik

Auzitegi Nazionaleko gai penaletarako aretoak Josu Urrutikoetxea ETAko buruzagi politiko ohiaren aurkako epaiketa abiatzea erabaki du, 1987an Zaragozako kuartelaren aurka egindako erasoagatik. ETAk hamaika pertsona hil zituen, horien artean, sei ume.

Auzia artxibatzea eta behin betiko largestea eskatu zuen defentsak, eta froga osagarri gehiago egitea planteatu zuen, baina ebazpenak atzera bota du. Horrela, Ismael Moreno epaileak zuzendutako instrukzioaren sumarioa amaitutzat jo du Jose Ricardo de Prada magistratuak.

Instrukzio osagarri baten eskakizuna ez dela egokia uste dute magistratuek, instrukzio-epaileak lortutako zantzuen berri izan ondoren. Era berean, "instrukzio fasean planteatu ez dena" onartzea baztertu dute.

Gertakariak delitu ez zirela argudiatu zuen defentsak, baina epaimahaiak atzera bota du. Auzitegi Nazionaleko hirugarren aretoak Urrutikoetxea auzipetzeko ebazpena baieztatu zuen iragan uztailean, errudun jotzeko zantzuen "indarra" aztertu ondoren, gogorarazi dutenez.

Jorge Piedrafita akusazio partikularreko eta herri-akusazioko abokatua pozik agertu da ahozko epaiketaren hasierarekin. Ebazpenaren aurka helegitea jartzerik ez dagoela azpimarratu du Piedrafitak; beraz, ETAko buruzagi ohia "aulkian esertzeko behin betiko pausoa" da.