Politika -
Andaluziako hauteskundeak
PPk gehiengo absolutua lortuko luke Andaluzian, inkesten arabera
Kazetek zabaldutako galdeketen emaitzen arabera, Alderdi Popularrak aise irabaziko lioke PSOEri, 8 eta 11 punturen arteko aldearekin.
Erredakzioa
Alderdi Popularrak gehiengo absolutua eskuratuko luke datorren igandean Andaluzian izango diren hauteskundeetan, gaur Espainia mailako egunkariek zabaldutako inkesten arabera. Horrela, Alderdi Popularrak aise irabaziko lioke PSOEri, 8 eta 11 punturen arteko aldearekin.
"ABC" kazetak argitaratutako inkestaren arabera, PPk 11,4 puntuko aldea aterako lioke PSOEri. Hortaz, Javier Arenasen alderdiak botoen % 47a eskuratuko luke eta Jose Antonio Griñan buru den PSOEk, berriz, botoen % 35,6a.
Gauzak horrela, Andaluziako Alderdi Popularrak 58 diputatu izango lituzke (gehiengo absolutua 55 diputatuekin lortzen da) eta PSOEk, ordea, 43 diputatu (aurreko hauteskundeekin alderatuta, 13 diputatu gutxiago).
"El Pais"ek Metroscopiari eskatutako inkestaren arabera, baliteke Javier Arenasek 59 diputatu lortzea, Jose Antonio Griñanek, 41 eta Ezker Batuak, 9. Egunkari honek igande honetan kaleratutako azalak horrela dio: "PSOEren porrotak PPri gehiengo absolutua emango lioke Andaluzian". Halaber, inkestaren datuen arabera, herritarren % 72ren ustez, beharrezkoa da Gobernu aldaketa bat.
"El Mundo" egunkariak, berriz, horrela titulatu du albistea: "Hauteskundeetarako astebetera, PPk oraindik ez du gehiengo absolutua lotu". Sigma-Dosek kazeta honentzako egindako zundaketaren arabera, Andaluziako PPk botoen % 45,8a lortuko luke eta PSOEk, botoen % 36a, 9,8 puntuko aldearekin.
