Politika -
DIPUTATUEN KONGRESUA
Kongresuko Mahaiak atzera bota du Martin Villaren agerraldia eskatuz EH Bilduk egindako eskaria
EH Bilduk Martin Villa ministro frankista ohiaren agerraldia eskatu zuen Espainiako Kongresuko Konstituzio Batzordean. Kongresuko Mahaian ordezkaritza duten PSOEk, PPk eta Voxek aurka bozkatu dute. Unidas Podemosek soilik bozkatu du alde.
AGENTZIAK | EITB Media
Diputatuen Kongresuko Mahaiak betoa jarri dio Rodolfo Martin Villa ministro frankistaren agerraldia eskatuz EH Bilduk egindako eskaerari. Kongresuko Mahaian ordezkaritza duten lau alderdietatik, hiruk, (PSOE, PP eta Vox) aurka bozkatu dute eta, Unidas Podemosek, ostera, alde.
Aurreko astean, EH Bilduk Martin Villa ministro frankista ohiaren agerraldia eskatu zuen Espainiako Kongresuko Konstituzio Batzordean, krimen frankisten harira berriki egin dituen adierazpenengatik.
"Ni izan ninteke — esan zuen ironiaz — arduradun politikoa, baita heriotza horien erantzule penala ere. Baita eromen-une batean egile materiala. Dena dela, ez da egia ni gobernu demokratiko baten aldeko herritarrak izutzeko plan bat sortu zuen gobernuko kide izatea", adierazi zuen urtarrilaren 17an egindako gosari informatibo batean.
Aldi berean, Rodolfo Martin Villak ukatu egin zuen Espainiako Trantsizioan "plan sistematiko, deliberatu eta orokortu" bat egon zenik aurkari politikoa deusezteko.
PSOEk, PPk eta Voxek kontra bozkatu dute, argudiatuz Martin Villak ezin duela Konstituzio Batzordean hitz egin Gobernuko kidea ez delako. Unidas Podemosen esanetan, ostera, Kongresuko Araudiaren 44.4 artikuluak hori ahalbidetzen du.
