Politika -
Adierazpen polemikoak
Urkullu: 'Lopezi barkamena eskatzeko, ostikada eman dit Basagoitik'
EAJren presidenteak uste du PPren EAEko buruak "burla eta errespetu falta" erabili zituela lehendakaria kritikatzeko.
Erredakzioa
Iñigo Urkullu EAJren presidenteak Antonio Basagoiti PPren EAEko burua kritikatu du Patxi Lopez lehendakariari barkamena eskatzeko "ipurdian ostikada" eman diolako. Buruzagi jeltzalearen arabera, Basagoiti "labaindu" egin da lehendakaria Homer Simpsonekin alderatu duenean.
Urkulluk horrela erantzun dio Basagoitiri Punto Radio Eusadin egin dioten elkarrizketa batean, izan ere, Basagoitik "ziniko" deitu zion Urkulluri errespetu instituzionala eskatzeagatik.
Antonio Basagoitik "gaur egungo lehendakariaren karikatura" egin zuela kritikatu du Urkulluk, eta argi adierazi nahi izan du "kritika politikoaren, burlaren eta errespetu faltaren artean dagoen aldea".
"Nik uste dut gutxitan, edo inoiz ez dudala egin kritika pertsonalik edo karikaturarik erakunde baten inguruan. Ez dakit Basagoitik barkamena eskatu duen, Basagoitik eta lehendakariak konpondu behar duten arazo bat da", adierazi du Urkulluk.
"Ostikada ipurdian"
"Bitxia da Basagoiti jaunak eta PPk barkamena eskatu nahi izatea EAJren presidenteari ostikada bat emanez", gaineratu du buruzagi jeltzaleak Basagoitik "ziniko" esan ziola eta.
