EH Bilduren oinarrien % 81ek hezkuntza-ituna berretsi du

EH Bilduk Batzar Nazionala egin du gaur Gasteizko Europa Jauregian, gaurkotasun politikoa aztertzeko eta Eusko Legebiltzarrean hezkuntza-itunaren inguruan lortutako akordioa berresteko. Bozketan, % 81 aldeko botoak izan dira, % 8 kontrakoak eta % 11 zuriak.

Arnaldo Otegi koalizioko koordinatzaile nagusiak azpimarratu du "babes zabala" lortu duela akordioak, eta esan du EH Bildu akordioetan dagoenean "jendea irabazten" dela.

Bestalde, Otegik azpimarratu du EH Bilduk errefusatu egin duela Errusiak Ukraina inbaditu izana, eta ohartarazi du "gerra-pizte nuklearra" izateko arriskua dagoela,  "arma-eskalada" jarraitzen badu.

"EH Bilduk hasieratik izan duen jarrera" gogorarazi du "batzuei izorratzen badie ere, inbasioaren guztiz kontrakoak gara. Ez gaude ados armak bidaltzearekin eta arma-eskaladarekin, horrek gerra-pizte nuklearra izan dezakeen agertoki batera eraman gaitzakeelako", ohartarazi du.

Hori dela eta, "Nazioarteko komunitateak babestu behar duen irtenbide diplomatiko baten" alde agertu da. "NATOri ezezko botoa eman genion Gernikako seme-alabak gara", gaineratu du.

Ondorio ekonomiko eta sozialei dagokienez, Otegik iragarri du EH Bilduren mahai politikoak astelehenean aztertuko dituela "munduko egoera geopolitikoak sortzen dituen arazoak".

"Mundu guztiak hitz egiten du energiaren gorakadaz, elikadura-katean produktu jakin batzuen gabeziaz, bizitzaren garestitzeaz, eta egoera aztertu behar dela uste dugu. Eliteek egiten dute gerra baina jendeak sufritzen ditu; beraz, astelehenean gauzak nola ikusten ditugun aztertuko dugu eta egin behar dela uste dugunaren proposamena egingo dugu", amaitu du.