Politika -
GERRA UKRAINAN
Talde parlamentarioekin bilduko da Urkullu datorren astean, Ukrainako gerra ardatz harturik
Datorren astean ekingo dio lehendakariak bilera errondari. Astelehenean PP+Cs eta Voxekin batzartuko da, eta biharamunean, Elkarrekin Podemos-IUrekin, EH Bildurekin eta Eusko Jaurlaritza sostengatzen duten alderdiekin (EAJ eta PSE-EE).
EITB MEDIA
Iñigo Urkullu lehendakaria Legebiltzarreko talde parlamentarioekin harremanetan jarri da datorren astean horiekin guztiekin bilerak egiteko, Ukrainako krisiak eragindako egoera "zailari" heltzeko eta erakundeek egoera horretan abian jarri dituzten ekintzen inguruko errepasoa egiteko. Gainera, Berpiztu plan bereziaz eta Jaurlaritzak aurreikusitako inbertsio estrategikoen planaz ere arituko da bilerotan.
Datorren astean ekingo dio lehendakariak bilera errondari. Astelehenean, hilak 4, PP+Cs eta Voxekin batzartuko da.
Asteartean, hilak 5, Elkarrekin Podemos-IUrekin, EH Bildurekin eta Eusko Jaurlaritza sostengatzen duten alderdiekin (EAJ eta PSE-EE) elkartuko da.
Gobernu bileraren osteko prentsaurrekoan Bingen Zupiria Eusko Jaurlaritzako bozeramaileak azaldu duenez, lehendakariak jakinarazi die Legebiltzarreko talde parlamentarioetako ordezkariekin harremanetan jarri dela bilera egutegi bat ezartzeko eta indar politikoen aldetik erantzun "positiboa" jaso duela.