Politika -
Espioitza politikoa
Podemosek eta alderdi independentistek CNIa eta Margarita Robles jo dituzte espioitzaren arduradun nagusitzat
Unidas Podemosek, ERCk, EH Bilduk, Juntsek, PdeCATek, CUPek, Mas Paisek, Compromisek eta BNGk adierazi dutenez, Israelgo 'softwarea' gobernuek bakarrik eskura dezakete, eta, beraz, "Espainiako Estatuaren inplikazioaren susmoa sinesgarria baino gehiago da".
EITB MEDIA
Alderdi independentistek eta Podemosek adierazpena kaleratu dute Espainiako Gobernuari behingoz argibideak eman ditzan eskatzeko, orain arte egindakoa motz geratzen dela iritzita.
Unidas Podemosek, ERCk, EH Bilduk, Juntsek, PdeCATek, CUPek, Mas Paisek, Compromisek eta BNGk sinatutako adierazpen bateratu horretan ohartarazten dute, onartezina dela estatu demokratikoetan espioitza, aurkari politikoaren aurka erabiltzea; CNIa jomugan jartzen dute, baita, Margarita Robles Defentsa ministroa ere.
Espainiako Gobernuari urratsak lehen bait lehen emateko exigitzen diote, bestela, ondorioak izango direla argi utziz. Eta, PSOEri, zuzenean, Kongresuan ikerketa batzordearen sorrera ahalbidetzeko deia egin diote.
Espainiako Gobernuak, baina, azpimarratzen du ateak itxita egiten den sekretu ofizialen batzordea dela Pegasus auzia argitzeko tokia; ez da alderdiek eskatzen dutena.
Adierazpen bateratuan, bide batez, Kongresuko presidenteari neurriak hartzeko eskatzen diote taldeek, espioitza jasan duten diputatuak, tartean EH Bilduko Jon Iñarritu, babesteko.
