ETAk zauritutako ertzaina: 'Aurpegian sentitu nituen talkak'

2003an Herrera mendatean ETAko kideen eta Ertzaintzaren artean egon zen tiroketan zauritu zen ertzain batek deklaratu du Auzitegi Nazionalean Urtzi Gainza epaitzen duen epaiketan. Dena "oso azkar gertatu zen eta eskopeten talkak aurpegian nabaritu nituen", adierazi du.

"Ilun zegoen eta ez genuen ezer ikusten. Dena oso azkar gertatu zen eta bat-batean eskopetako talkak aurpegian sentitu nituen", esan du zauritutako ertzain batek.

2003ko irailaren 14an gertatu zen eta Arkaitz Otazua ETAko kidea hil zen bertan.

Deklaratu duen beste ertzain baten arabera, abisua jaso zuten beste patruila batek "arazoak" zituela esanez.

"Bertaratu ginenean lankide bat zaurituta topatu genuen, besoan zauri bat zuen. Beste ibilgailu batek argiak piztuta zeuzkan eta hurbildu nintzenean pistola bat eta mugikor bat aurkitu nituen", esan du. Gainera, beste bi lagun zuhaitz batean lotuta aurkitu zituztela adierazi du. ETAko kide gisa identifikatu zirela gaineratu du eta pistolak euren burutik 20 zentimetrora jarri zituztela kontatu du.

Gertaeraren tokian hainbat arma eta DNA aurkitu zuten. Ondoren akusatuaren etxebizitzako arrastoekin alderatu eta Gainzarenak zirela berretsi zuten.

76 urteko espetxe zigorra eskatzen du fiskalak akusatuarentzat. Azken honek ez du deklaratu nahi izan eta ETAko kide izatea ukatu du, bait gertaeran parte hartu izana ere. Epaiketan Asier Mardonesek deklaratu du, gertaera honengatik aurretik kondenatutako ETAko kideak, eta ukatu egin du Gainza taldeko kide izatea. Gainera, bere izena torturapean esan zuela adierazi du.

Epaiketak bihar 10.00etan jarraituko du.