Bilbao: 'Patxi Lopezen Gobernua hilda dago'

Jose Luis Bilbao Bizkaiko ahaldun nagusiak (EAJ) Euskadik "ahalik eta azkarren" gobernu berri bat behar duela esan du, Patxi Lopezen lidergotza "jada hilda" dagoela azpimarratuz.

Antonio Basagoiti EAEko PPren buruak esandakoaren harira egin ditu adierazpen horiek Bizkaiko ahaldun nagusiak. Basagoitik PSE-EErekin zuen ituna agortuta dagoela adierazi zuen astelehenean eta hauteskundeak aurreratzeko eskatu zion lehendakariari.

"Zorionez gobernu hau agortuta dago eta azken kolpea izendatu zuenak, aukeratu zuenak eman dio, izan ere Lopez PPk botoa eman ziolako izan da lehendakari", esan du jeltzaleak.

Hori dela eta, "ahalik eta azkarren, egun ditugun arazo larriei erantzuteko gai den" exekutibo berri bat behar behar dela azpimarratu du.

"Prentsaurrekoaren, argazkiaren eta itxuraren gobernua amaitu da, gobernu hau hilda dago", esan du.