Bakartxo Ruiz: "EH Bilduk determinantea izaten jarraituko du gobernu aurrerakoiak osatzeko"

Bakartxo Ruiz Nafarroako Parlamentuan EH Bilduk duen eleduna zuhurtziaz mintzatu da EITB Focusek foru hauteskundeen boto asmoari begira egindako inkesta baloratzeko orduan. Dena dela, koalizio subiranistari aurreikusten zaion gorakadari esker, nabarmendu du EH Bilduk "determinantea" izaten jarraituko duela gobernu aurrerakoiak osatzeko eta "UPN-PSN ententea geldiarazteko" orduan, "oraingo legegintzaldian bezala".

Nafarroako Parlamentuan kazetarien galderei erantzunez egindako adierazpenetan, Ruizek esan du "inkestak beti inkesta" direla, eta ohartarazi du oraindik urtebete falta dela bozetarako eta argitzeke dagoela zenbat indar aurkeztuko diren.

"Inkestak joerak atzematen ditu, eta guri behintzat goranzko joera aurreikusten digu, horrek bat egiten du beste inkestekin eta guk ditugun datuekin eta sentsazioekin. EH Bildu gero eta indar sendoagoa da, sustraituagoa, eta, beraz, joera hori berresten du inkestak", adierazi du.

Bestalde, Voxen igoera "kezkagarria" dela esan du EH Bilduko buruzagiak, eta "ultraeskuinaren gorakadak gauzapen konkretua duela —bina ordezkari lortuko lituzke Parlamentuan eta Iruñeko Udalean— ikustea, are kezkagarriago", erantsi du

Azkenik, Joseba Asiron EH Bilduren alkategaiak berriro Iruñeko aginte makila eskuratzeko dituen aukerez galdetuta, Ruizek erantzun du EH Bilduk honako helburua duela hurrengo hauteskundeetarako: "2019an udaletan gertatu zena, tartean Iruñeko Udalean gertatutakoa, berriro ez gertatzea. Ematen du beste baldintza batzuk egongo dira 2023rako, eta gure ustez Asiron da ezkerreko gehiengoak, gehiengo aurrerakoiak bat bilduko lituzkeen" hautagaia.