Politika -

OMENALDIA

Miguel Angel Blanco oroitu dute Ermuan haren bahiketa eta hilketaren 25. urteurrenean

ETAk hildako zinegotzia omentzeko ekitaldia agintarien ordezkaritza zabal batek babestu du baina, beste behin, ez du talde politiko guztien babesa izan.

Ordezkari politikoak, igande honetan Ermuan. Argazkia: EFE
Ordezkari politikoak, igande honetan Ermuan. Argazkia: EFE
Miguel Angel Blanco oroitzeko Estatu omenaldia egin dute Ermuan, igande honetan

02:05

eitb media

Whatsapp Facebook Twitter Telegram Email

Miguel Angel Blanco omentzeko ekitaldia izan da igande honetan Ermuan, ETAk hil zuela 25 urte beteko direnean, eta euskal zein espainiar agintarien ordezkaritza zabal batek parte hartu du horretan.

Ekitaldia 12:30ean hasi da, Miguel Angel Blanco kiroldegian eta, nahiz eta ordezkaritza politiko eta sozial zabal batek babestu duen, ez du, beste behin ere, talde politiko guztien babesa izan.

Hala, Iñigo Urkullu lehendakaria, Jaurlaritzako beste ordezkari batzuek lagunduta, Pedro Sanchez Espainiako Gobernuko presidentea, Felipe VI.a erregea, Juan Carlos Abascal herri bizkaitarreko alkatea, eta Marimar Blanco, besteak beste, izan dira bertan.

Juan Carlos Abascal Ermuko alkateak ireki du ekitaldia. Ohartarazi duenez, "bakea eta pluratasunarekiko errespetua ezegonkor daude", eta "faxismoen, populismoen eta nazionalismo atzerakoien gorakadak elkarbizitza urratzen du".

"Egun tristea da askatasunarentzat, demokraziarentzat eta itxaropenarentzat, baina gure bizitzak inbaditu zituen beldurra garaitzeko balio izan zigun", gaineratu du, eta erregearen bertaratzea eskertu du jarraian, duela 25 urte bezala.

Era berean, adierazi du beharrezkoa dela "memoriatik biktimei egindako minari laguntzea, eta pluraltasunarekiko errespetuan oinarritutako gizarte baten eraikuntzari".

Marimar Blancok, hildakoaren arrebak, hitza hartu du, aldarrikatzeko memoria demokratikoak "zintzoekin eta gaiztoekin, biktimekin eta borreroekin" aitortu dezala terrorismoaren historia. "Justiziak eta egiak edozein gobernuren lehentasun izan behar lukete. Kontrakoa ez da ez bidezkoa, ez zuzena", azpimarratu du.

Duela 25 urteko gertakariak gogoratu ostean, Blancok salatu du ETAk neba hil zuela "adorez defendatzen zituelako euskal herritar zein espainiar izateko eskubidea eta Konstituzioa, zuzenbide Estatua zein Estatutua", eta ezin zutela hori jasan.

Blancoren arabera, 'Ermuko espiritu' deritzona "elementu nuklearra izan zen ETAren porrot operatiboan", baina ohartarazi du ez zuela "behin betiko garaipena" suposatu. "Krimenen bidez lortu nahi zituzten helburuek inoiz baino biziago jarraitzen dute, bandaren oinordekoengan haragituta", gaineratu du.

Era berean, nabarmendu du biktimek ez dutela sufrimendu estereotipo bat izan nahi, "justizia egitea baizik, gertatutakoaren egia errespetatu dadila perbertsiorik gabe". "Argi utziz ez zela gatazkarik egon, eta batzuk modu koldarrean eta zorigaiztokoan hiltzen zuten bitartean, beste batzuk hil egiten zirela", esan du.

Mari Mar Blanco: ''Bidezkoa izateko, memoria demokratikoak onak eta txarrak bereiztu behar ditu''
Mari Mar Blanco: ''Bidezkoa izateko, memoria demokratikoak onak eta txarrak bereiztu behar ditu''
Mari Mar Blanco: ''Bidezkoa izateko, memoria demokratikoak onak eta txarrak bereiztu behar ditu''

0:25

Iñigo Urkullu lehendakariak eskainitako hitzaldian, "hausnarketa ausarta eta autokritika zintzoa" eskatu dizkie "indarkeria terrorista gauzatu eta babestu zutenei", azken egunotan ezker abertzaleari errepikatutako eskaera.

Lehendakariak nabarmendu du ETAren indarkeria "bidegabekoa" izan zela, baina taldea desegin ondoren Euskadik "memoriaz" eraiki behar duela etorkizuna. "Ez dugu berriro hutsetik hasi behar, ezta nahi ere, inoiz ezer gertatu ez balitz bezala", adierazi du.

Urkullu: "Bakearen ondarea da eskaini dezakegun omenaldirik onena"

Urkulluk "egia argigarri, sendagarri, eraldatzaile eta adiskidetzaile" baten alde egin du, "elkarbizitza" eraikitzeko, indarkeriari "zilegitasuna errotik kenduta", eta elkarrizketarekiko zein giza eskubideekiko errespetutik.

"Bakean bizi den Euskadi bat, balio etiko eta demokratikoen gainean eraikia, elkarbizitza memoriaz eraikitzen duena. Hori da gaur Sotero Mazari eta Miguel Angel Blancori eskaini diezaiekegun ondarerik onena", aldarrikatu du lehendakariak.

ZURE INTERESEKOA IZAN DAITEKE: Erlojuak gelditu zituzten 48 orduak

Bestalde, Pedro Sanchez Espainiako Gobernuko presidentea memoria kolektibo berri bat eraikitzearen alde agertu da, terrorismoaren biktimek haragitzen dituzten balio demokratikoak zaintzeko.

Presidenteak iragarri duenez, espainiar Estatu osoko Bigarren Hezkuntzako eta Batxilergoko ikasleek terrorismoaren biktimen "lekukotza zuzena" jasoko dute, Euskadin aurretik ere egin izan den bezala.

Sanchezek gogora ekarri du 1997an Ermuko Espirituarekin gertatutakoaren ostean euskal eta espainiar gizarteak "beldurra" galdu zuela, eta ez zela "isilik" gelditu terrorismoaren aurrean.

Gainera, Felipe VI.a erregeak eusteko eskatu du, "bizitakoa ez ahazteko, batasunak gure historia garaikidearen inguruan elkartu gaitzan, eta Ermuko Espirituak egunero gogora ekarri diezagun bakearen, bizitzaren, askatasunaren eta demokraziaren balioa".

Felipe VI.ak ohartarazi duenez, ezin da onartu "zenbait belaunaldik ez jakitea gure historiako egun mingarri horietan gertatu zena, ez jakitea nola eta zergatik batu zuen gure kontzientzia kolektiboa, ez ezagutzea gure bizitza demokratikoa horrenbeste markatu zuen hilketa batek Espainian eragindako mugimendu masiboa edo nola finkatu zuen gure elkarbizitza".

Hau zure interesekoa bada, baliteke beste gai hauek ere izatea
Politika Iñigo Urkullu Ermua Espainiako Felipe VI.a ETA Pedro Sánchez Eguneko albisteak Albisteak Terrorismoaren Biktimen Azken Ordukoa Erailketak Durangaldea