Politika -
Autogobernua
Espainiako Gobernuak eta Jaurlaritzak uztailaren 29an aztertuko dute eskumenen eskualdatzearen atzerapena
Joan den astean, Pedro Sanchezek aitortu zuen Eusko Jaurlaritzarekin adostutako egutegia ez dutela bete eta azpimarratu zuen zenbait eskumen eskualdatzea "zaila" izango dela.
AGENTZIAK | EITB MEDIA
Isabel Rodriguez Espainiako Lurralde Politika ministroa eta Olatz Garamendi Eusko Jaurlaritzako Autogobernu sailburua uztailaren 29an bilduko dira Leioan, Gernikako Estatutuko eskumenak eskualdatzeko prozesuaren baitan ematen ari diren atzerapenak argitzeko.
Rodriguez Euskal Autonomia Erkidegoan izango da datorren astean eta bisita hori baliatuko dute autogobernuari buruzko batzarra egiteko, Eusko Jaurlaritzako iturriek baieztatu dutenez.
Joan den astean, Pedro Sanchezek Espainiako Kongresuan Euskal Autonomia Erkidegoko eskumenen harira egindako adierazpenek haserrea eragin zuen Iñigo Urkulluren Gobernuan.
EAJk egindako galderari erantzunez, Espainiako Gobernuko presidenteak aitortu zuen eskumenen eskualdatzerako Jaurlaritzarekin 2020an adostu zuten egutegia ez direla betetzen ari eta kronograma horretan jasotako lau eskumen euskal erakundeen esku uztea "oso zaila" izango dela ohartarazi zuen.