'Prozesuan zehar presoak aske gelditzea' eskatu du ezker abertzaleak

Gorka Elejabarrieta ezker abertzaleko ordezkariak "ETAk jarduera armatua amaitu duela iragarri arren atxiloketekin eta jazarpenekin" jarraitzen dela adierazi du. Gainera, presoak "gatazkaren irtenbidearen partaide" izan behar dutela defendatu du eta horretarako, "eskubideak errespetatu eta prozesuan zehar aske utzi" beharko dituztela adierazi du.

Irlandan, Killarney hirian egiten ari diren Sinn Feinen urteroko biltzarrean, euskaldunek eta irlandarrek "historian zehar antzeko ibilbidea" izan dutela nabarmendu du Elejabarrietak, eta "orain, biak bakearen eta justiziaren bidean sartzen ari gara". Laster, "Irlanda bezala, herri askea izateko" gogoa agertu du.

Nazioarteko buruzagiek 2011ko urrian, Donostian, "gatazkaren irtenbiderako bidaia orria" aurkeztu zutela azaldu du, eta ondoren, ETAren iragarpena iritsi zela, baina, ezker abertzaleko ordezkariak salatu du, "gatazka oraindik konpondu gabe" dagoela, bere ustez, "poliziaren indarkeriak eta jazarpenak indarrean jarraitzen duelako".

Bakea justizian oinarritu behar dela defendatu du, eta horretarako "alde guztien arteko elkarrizketaren" alde azaldu da, "behin betiko bakea lortzeko, non euskal herritarren erabakitzeko eskubidea onartua izango den".

"ETAren eta Espainiako eta Frantziako gobernuen arteko elkarrizketa beharrezkoa da", Elejabarrietaren ustez, "presoak askatzea, armak uztea eta desmilitarizazioa" hizpide izanez. Gainera "ETAko presoak elkartzea eta lehenbailehen Euskadira hurbiltzea" eskatu du.

Ildo honetan, "irtenbidearen partaide izateko garaia iritsi zaie", adierazi du eta horretarako "euren eskubideak errespetatu behar dira eta prozesuan zehar aske gelditu beharko dira", azpimarratu du.