Aragonesek eta Turullek hurbilketa bat aztertu dute, arrakastarik gabe, haustura giroan

Pere Aragones Generalitateko presidenteak eta Jordi Turull JxCateko idazkari nagusiak jarrerak hurbiltzeko bilera egin dute igande honetan, ERCren eta JxCaten espazio politikoen arteko haustura giroan.

Aragonesen eta Turullen arteko harreman diskretuak negoziatzeko azken ahalegina izan da, gaur gauean Juntsek bere oinarriei kontsulta bat deitu aurretik ezarri zuen epea amaitu aurretik.

Hala ere, Efe albiste-agentziak kontsultatutako iturrien arabera, kontaktuak igande goizera mugatu dira eta ez dute "ezer berririk" ekarri bi gobernukideen arteko krisia bideratzeko.

ERCrekin akordioa lotzeko JxCatek emandako epea gauean bukatuko da. Juntseko militanteek galdeketa dute urriaren 6ean eta 7an, eta Kataluniako Gobernuan jarraitzea nahi duten galdetuko diete.

Ostiral gauean JxCatek baldintza-agiria luzatu zion Aragonesi. Kataluniako presidentearen hitzetan, dokumentu hori "ez dago akordiorako borondatearekin eginda", Gobernutik ateratzeko aitzakia gisa planteatuta baizik.   

Dokumentu horren arabera, akordiorako baldintzetako bat da Jordi Puignero Gobernuko presidenteordeari kargua itzuli behar diotela. Aragonesek Puignero kargugabetu zuen konfiantza-mozio baten arriskuaz ez abisatzea egotzita.

Aragonesek TV3ri jakinarazi dionez, beste baldintzetako batek "Kataluniako erakundeak Errepublikaren Kontseiluaren azpitik uzten ditu". Carles Puigdemont Kataluniako presidenteordeak gidatzen du Belgatik Errepublikaren Kontseilua. "Ez da akordioa lotzeko proposamenik", salatu du Aragonesek, eta Puigneroren kargugabetzeari eutsiko diotela iragarri du, esanez "ultimatumek" ez dutela laguntzen.

15:23

JxCatek Kataluniako Gobernua utziz gero, Aragonesek argi du ez dituela hauteskundeak deituko, Exekutiboaren "iraunkortasun eta jarraikortasunaren alde" lan egingo duela baizik.