Politika -
Espetxe aldaketak
Barne Ministerioak ETAko beste 11 preso Euskal Herriratuko ditu
Besteak beste, Andoni Otegi, Mattin Sarasola, Harriet Iragi, Asier Arzalluz, Gurutz Agirresarobe, Julen Atxurra, Iker Olabarrieta, Itziar Moreno eta Iratxe Sorzabal dira.
EITB Media
Barne Ministerioaren menpe dagoen Espetxeetako Idazkaritza Nagusiak ETAko beste 11 preso Euskal Herriko kartzeletara hurbilduko dituela jakinarazi du.
Txanda honetan lekualdatuko duten presoetako bat Andoni Otegi izango da, zeinak Logroñoko espetxea utzi, eta Eusko Jaurlaritzak erabakitako beste batera eramango duten, espetxeen transferentzia gauzatu ondoren. Biktimekin batera egindako topaketetan parte hartu duen presoetako bat da.
Barne Ministerioaren menpeko erakundearen arabera, Euskal Herrira hurbildutako beste presoetako bat Mattin Sarasola izango da.
Harriet Iragi ere agertzen da zerrendan -gaur egun Logroñon dago-. Asier Arzalluzek Logroñoko espetxea utziko du Euskadiko beste batera joateko. Gurutz Agirresarobe, Julen Atxurra eta Iker Olabarrieta ere hurbilduko dituzte.
Gainera, Frantziak entregatutako bi preso euskal espetxeetara hurbilduko dituzte. Itziar Moreno eta Iratxe Sorzabal dira atxilotuak, azken hori ETAko buru ohia, behin-behineko espetxealdian. Barne Ministerioak erabaki du kartzela aldaketa, epaia irmoa izan arte.
Terrorismoaren Biktimen Elkarteak (AVT) kritikatu egin du Barne Ministerioaren menpe dagoen Espetxeetako Idazkaritza Nagusiak ETAko preso guztiak "Gabonetan etxera" hurbiltzeko plana aurrera eramatea. "Dagoeneko, hilerrietako haurrek bost axola diote mundu guztiari", deitoratu du, biktimekiko "axolagabekeria" gaitzetsiz.
Sareren arabera, espetxe aldaketa horien ondoren, 23 preso geratuko lirateke oraindik Espainiako espetxeetan, eta beste 17 Frantziako, espetxeetan. Euskadi, Nafarroa eta Espainiako Estatuko espetxeetan, 198 preso daude. EAEko espetxeetan 137daude, eta Nafarroan, 9.