Itxi

Politika

Tragedia hesian

Unidas Podemosek eta oposizioak ondorioztatu dute Melillako bideoak ez datozela bat Marlaskaren bertsioarekin

Agentziak | EITB Media

Unidas Podemosek eta alderdi independentistek ikerketa batzorde bat eskatu dute. PPk eta Ciudadanosek Barne ministroak asteazkenean Kongresuan egingo duen agerraldiari itxarongo diote, babestu ala ez erabaki aurretik.

  • Melillako hesia. Artxiboko argazkia: EFE

    Melillako hesia. Artxiboko argazkia: EFE

Unidas Podemosek eta oposizioko taldeek ondorioztatu dutenez, ekainaren 24ko Melillako tragediaren bideoak ez datoz bat Fernando Grande-Marlaska Barne ministroak Espainiako aldean "gertakari tragikorik" egon ez zela dioen bertsioarekin; beraz, inork, ezta PPk edo Ciudadanosek ere, ez du baztertzen Diputatuen Kongresuan ikerketa bat eskatzea.

Koalizio moreak eta alderdi independentistek ikerketa batzordea eskatu dute Kongresuan, eta PPk eta Ciudadanosek (ez zuten sinatu) datorren asteazkenean Barne ministroak Kongresuan egingo duen agerraldiari itxarongo diote, ikerketa parlamentarioa babestu ala ez erabaki aurretik.

"Ezin da ukatu gertakari nagusiak Espainian jazo zirela", esan du, laburbilduta, Jon Iñarritu EH Bilduko bozeramaileak, eta Barne ministroa orain arte "gardentasun gutxikoa" izan dela eta "orokortasunetan ezkutatu" dela esan du. "Esan al du ministroak egiarik?" galdetu du.

Alderdi Popularra, Vox eta Ciudadanos bat datoz Guardia Zibilaren "profesionaltasuna" defendatzearekin eta agenteak erantzukizunetik salbuestearekin. Hori bai, Ana Vazquezek (PP) uste du Grande-Marlaskak dimisioa eman behar duela. Barne ministroarekin bat egiten duten puntu bakarrean, fokua Saharaz hegoaldeko herritarren indarkerian jartzean da — Voxek egin duen bezala —.

Barne Ministerioaren "gardentasuna" azpimarratuz, David Serrada PSOEko bozeramaileak kontrako bertsioa eman du, irudiak ateak itxita ikusi ondoren.

Unidas Podemosek eta EH Bilduk ukatu egin dute pertsona migratzaileek "eraso militar" bati dagokion neurriz kanpoko indarrarekin jokatu izana, eta oraindik hildakoen eta zaurituen kopuruaren daturik ez izatea kritikatu dute.

  • Bisitatuena

      Kargatzen ikusiena
      Kargatzen ikusiena