Bolaños: "PSOEren eta Podemosen adosgune dira onespena gako izaten jarraitzea eta zigorrak ez txikitzea"

Felix Bolaños Espainiako Presidentetza ministroak asteazken honetan azpimarratu du PSOE eta Unidas Podemos bat datozela bi puntutan, sexu indarkeriaren aurkako legearen erreforma hizpide. Batetik, biek ala biek uste dute onespenak gako izaten jarraitu behar duela. Bestetik, onartezina iruditzen zaie sexu delituekin lotutako zigorrak arintzea.

"Negoziazioan, une giltzarria dugu", aitortu du ministroak komunikabideen aurrean, Ione Belarra Espainiako Gobernuko Eskubide Sozialen eta 2030 Agendaren ministroak hari buruz esandakoei buruz galdetu diotenean. Belarrak gaur bertan esan du PSOE "kikilduta" dagoela eta horregatik erabaki zuela "Bai bakarrik da bai" legea aldatzea.

Bolañosek, baina, ez ditu bazterrak nahastu nahi izan, eta "adosgune" dituzten bi puntu horiek aipatzera mugatu da.

Bestalde, Belarrak ziurtatu du beren gobernukideak "kikilduta" daudela. Gainera, nabarmendu du arazoa dela "epaile matxista eta patriarkalak" ez direla legea behar bezala aplikatzen ari.

"Legealdian zehar garbi geratu da Gobernuan bi indar politiko daudela: batek hankak dardarka ditu eta besteak ez. Pentsatzen dut PPren eta eskuineko justiziaren presioa duela PSOEk, eta horregatik nahi dutela nolabait legea aldatu", adierazi du.