Bilduk dokumentalaren diru-laguntza mantentzea erabaki du

Juan Karlos Izagirre Donostiako alkateak (Bildu) oposizioko taldeetako bozeramaileei ETAko presoei buruzko dokumentalari emandako 9.000 euroko diru-laguntza ez duela baztertuko esan du.

PSE-EEtik, EAJtik eta PPtik jakitera eman dutenez, Bozeramaileen Batzordean hitz egin dute gai honi buruz, Izagirrek diru-laguntza mantentzen duela esan du eta oposizioari "polemika antzua" sortzea leporatu dio.

Halaber, iturri berberek adierazi dutenez, Izagirrek Bilduko Gobernuko taldeko zinegotziei diru-laguntza hau onartzeak legezko aginduak urratu ditzakeela esan du, Udalak onartu arren.

ETAko bost presoren inguruko dokumentalarentzako finantza-laguntza onartzeak Bildu legez kanpo utz dezakeela ohartarazi zuen atzo Barne Ministerioak.

Oposizioak Udalaren jarduera datorren osteguneko osoko bilkuran gaitzetsiko du, PSE-EEk, PPk eta EAJk batera egindako mozio baten inguruko eztabaida izango dute. Haien ustez, dokumentalari emandako diru-laguntza "Donostiako alkateak terrorismoaren biktimenganako duen errespetu eta elkartasun faltaren eredu bat gehiago da".

Oposizioak Bilduri giza eskubideekin zerikusia duen diru laguntzarik ez emateko eskatu dio "Giza Eskubideen Udal Batzordean aztertu baino lehen".