UPyDk 'konstituzionalismoa konplexu gabe defendatuz' hazi nahi du

Gorka Maneiro Eusko Legebiltzarreko UPyDko ordezkariaren ustez, hurrengo hauteskunde autonomikoetan bere alderdia “bozka eta aulkietan” haziko da, eta hazkunde hori “konstituzionalismoa beldur eta konplexu gabe” defendatzeagatik izango dela gaineratu du.

Bilbon egindako prentsaurreko batean, 2009ko hauteskundeetan Araban lortutako eserlekua “mantentzearekin” konformatuko ez direla jakinarazi du Maneirok, eta bere helburua “anbizio handikoagoa” izango dela azpimarratu du, “Euskadiko konstituzionalismoaren erreferentzia” bihurtzea baita bere helburua.

Aurreko euskal hauteskundeetan bezala, Gorka Maneiro izango da UpyD alderdiaren hautagaia hurrengo hauteskunde autonomikoetan.

Paisaia nazionalista

Bere ustez, legegintzaldi honetan PPk eta PSEk ez dituzte bete kanpainan egindako agintzariak. “Beldurra izan dute, konplexuak izan dituzte eta, gainera, ideologia nazionalistaren tesi askotara batu dira”.

“Guk ez dugu paisaia nazionalistarekin erlazionatu nahi. Konstituzionalismoa beldur eta konplexu gabe defendatuko dugu”, azpimarratu du Maneirok.