Politika -
IZENBURU NAGUSIAK
Albiste izango dira: Sanchezen inbestidura, 2024ko Korrikaren aurkezpena eta Gaztea Maketa Lehiaketaren finala
Gaurkoan albiste izango direnen laburpena, hitz bitan.
EITB MEDIA
Honako gai hauek hartuko dituzte gaur, azaroak 16, hedabideetako lerroburu nagusiak:
-Sanchezen inbestidura: Inbestiduraren lehen saioko eztabaida gogorraren ondotik, Pedro Sanchez hautagai sozialista Espainiako Gobernuko presidente izendatuko dute ostegun honetan, lehen bozketan, PSOE, Sumar, ERC, EH Bildu, EAJ, Junts eta CC alderdietako diputatuen babesarekin. PPko eta Voxeko buruzagien hitzaldietan eta Sanchezen ondorengo errepliketan, kaleetako tentsioa Espainiako hemiziklora eraman dute asteazkenean.
-2024ko Korrikaren aurkezpena: Donostiako San Telmo Museoan aurkeztuko dute Korrikaren 23. edizioa. Martxoaren 14an hasi eta hamaika egun geroago, martxoaren 24an, bukatuko du euskararen aldeko lasterketak bere ibilbidea.
-Gaztea Maketa Lehiaketaren finala: Gaur aratsaldean izango da Maketa Lehiaketaren final handia, Bilboko Sala BBK aretoan. Bertan lehiatuko dira Itzek, Ganibet, Enbata Lorade eta Zilibito Records, aurtengo lau finalistak. 17:00etan abiatuko da finala, "Gu" saio bereziarekin. Bertatik igaroko dira finalistak, epaimahaikideak eta saioko ohiko kolaboratzaileak.