Politika -
Sekretuak agerraraztea
PSOEk Miguel Angel Rodriguez salatu du kazetarien datuak zabaltzeagatik
Haren telefonoa ikertzeko eskatu dute, kasuarekin zerikusia izan dezaketen mezuen frogak suntsitzea ekiditeko.
Agentziak | EITB MEDIA
PSOEk salaketa jarri du Isabel Diaz Ayuso Madrilgo Erkidegoko presidentearen kabineteburua den Miguel Angel Rodriguezen aurka, sekretuak zabaltzea egotzita, PSOEko iturriek Europa Press albiste agentziari baieztatu diotenez. Izan ere, Rodriguezek bi kazetariren datu pertsonalak zabaldu zituen publikoki.
Salaketaren arabera, El País egunkariko kazetariak martxoaren 19an identifikatu zituen Ayusoren "bizkartzaina den polizia nazional batek" eman zizkion Rodriguezi datu pertsonal horiek.
PSOEk Rodriguezen inputazioa eskatu du, berriemaile horien informazio pribatua filtratzeagatik, eta haren telefonoa ikertzeko ere, kasuarekin zerikusia duten mezuen "frogak suntsitzea saihesteko".
PSOEren zuzendaritza federalak adierazi duenez, Ayusoren eskolta gisa jarduten duen Espainiako Polizia Nazionaleko agenteak "elkartruke adeitsua" izan zuen, eta kazetariei prentsa-kredentzialak eta NANa eskatu zizkien, baina ez zuen salaketarik jarri.
Era berean, iturriek adierazi dute informazio hori Madrilgo Erkidegoko Segurtasuneko zuzendari nagusiari bidali zitzaiola, eta, "bi ordu geroago", Rodriguezek "gezur bat zabaldu" zuela datu pertsonal horiekin, hainbat hedabidetako profesionalekin duen txat baten bidez.
PSOEk, gainera, martxoaren 18an eta 19an Ayusoren eskolta izan ziren agenteak identifikatzea eskatu du, deklarazioa hartzeko. Halaber, Madrilgo Erkidegoko Segurtasuneko zuzendari nagusi Luis Miguel Gonzalez Moratori lekuko gisa deklarazioa hartzeko eskatzen dute, eta, gainera, datuak jakinarazi zitzaizkien kazetariak identifikatzeko, kaltetutzat jo ditzaten.