Muga jarriko diote polizien irudiak Interneten zabaltzeari

Ignacio Cosido Poliziako zuzendari nagusiak azaldu duenez, Herritarren Segurtasunaren Lege berriak euren funtzioetan dauden agenteen irudiak hartzea, tratatzea eta zabaltzea debekatuko du, pertsonak edota lan egiten ari diren operazioak arriskuan jartzen badituzte.

Cosidok honako hitzok esan ditu Funtzionario Independenteen Sindikatuaren Zentralarekin, Poliziaren Espainiako Konfederazioarekin eta Sindikatu Independenteen Europako Konfederazioarekin egindako bileran. Hori krisiak segurtasun indarren lanean izandako ondorioak aztertzeko egin dute.

Herritarren Segurtasunaren Legearen erreformak "herritarren eta segurtasun indarren eskubideen arteko oreka bat bilatu nahi du", azaldu du Cosidok.

"Euren funtzioetan dauden segurtasun indarren irudiak, soinuak eta datuak hartzea, erreproduzitzea eta tratatzea debekatuko da, euren bizitza edota garatzen ari diren operazioa arriskuan jartzen denean", adierazi du.

Agenteen intimitate pertsonala eta familiarra babestea izango du helburu, baita ohorearen eskubidea bermatzea ere. Gobernuak "aurrerapausoa" emango du Poliziaren lanari segurtasun gehiago emateko, "legezkotasunetik eta Eskubide Estatua betetzen denetik".

"Segurtasun indarrek egiten duten lan ikaragarria aitortzen izango dugu gizarte justuagoa, seguruagoa eta baketsuagoa", azpimarratu du Poliziaren zuzendariak. Lehengo astean aurpegia estali gabe manifestatzen direnei zigorra ezarriko zitzaiela proposatu zuen.