Alderdiek 30 ebazpen bozkatuko dituzte eztabaidaren bigarren egunean

Nafarroaren egoerari buruzko eztabaida egingo da Nafarroako Parlamentuan, bigarren egunez jarraian. Gaurko saioan Nafarroako Parlamentua osatzen duten alderdi politikoek (UPN, PSN-PSOE, Nabai, Bildu, PPN eta Izquierda-Ezkerra) bosna ebazpen-proposamen aurkeztuko dituzte, 30 guztira.

UPN alderdiaren proposamenak ondorengo alorrei buruzkoak dira: araudiaren “arrazionalizazioa” eta administrazioaren kostuak merkatzea, autogobernua eta Nafarroako Foru Komunitateko eskubide historikoak defenditzea, “defizita betetzea”, terrorismoaren biktimei elkartasuna adieraztea, eta Nafarroak ECOFIN-en lan bileretan parte hartzea.

Nafarroako Alderdi Sozialistak eskatuko du Industria Plana eta Gazteen Enplegu Plana martxan jartzea bi hilabeteko epean, pertsona fisikoen errentaren gaineko zerga eta ondare zerga igotzea, hezkuntza sistema publikoa indartzea eta defenditzea, hiritar guztien osasun arreta bermatzea, koordainketa baztertuz eta kalitatezko eta doako osasun sistema bermatuz.

Nafarroa Bai taldeak eskaera hauek egiten ditu bere ebazpenetan: ekonomia berpizteko neurriak hartzea, zerbitzu sozialen mantentzea ahalbidetuko duen sistema fiskala martxan jartzea, osasungintzako eta hezkuntzako murrizketak baztertzea, Aieteko Bake Konferentziako adierazpenari babesa eskaintzea, eta Nafarroako hiritarren “erabakitzeko eskubidea” defenfitzea.

Bilduk bestalde, helburu hauek lortu nahi ditu: herri galdeketak eta erreferendumak arautzea, hauteskundeak deitzea, politika fiskal berria onartzea, hezkuntzaren eta prestakuntzaren aldeko apustua egitea, Nafarroaren marko juridiko-politiko berria onartzea, eta “Euskal Herriko gainerako lurraldeekin batera estatua sortzea Europar Batasunaren baitan”.

Nafarroako Alderdi Popularrak hainbat helburu lortu nahi ditu aurkeztuko dituen ebazpenak onartuta: gurasoek haurren ikastetxea aukeratzeko duten eskubidea bermatzea, terrorismoaren biktimei eta egoera larrian dauden familiei laguntzea, gastu publikoa murrizteko austeritate plana onartzea eta Nafarroako foru erregimena defenditzea.

Azkenik, Izquierda-Ezkerra alderdiak eskatuko du erreforma fiskala egitea gehien irabazten dutenek gehiago ordaintzeko, banku publikoa sortzea, osasungintza eta hezkuntza indartzea, Nafarroako hizkuntza eta identitate aniztasuna onartzea, eta Nafarroa errepublika federal bihurtzeko lan egitea.