Albiste izango dira: Eusko Legebiltzarrak 45 urte, EAJren Batzar Nagusia eta Durangoko bonbardaketa

Honako gai hauek hartuko dituzte gaur, 2025eko martxoaren 31n, hedabideetako lerroburu nagusiak:

- Eusko Legebiltzarrak 45 urte: Eusko Legebiltzarraren 45. urteurrena betetzen den egunean, lehen legegintzaldiko legebiltzarkideak gogoratu eta omenduko dituzte Gernikako Juntetxean. Ekitaldia 1980ko martxoaren 31n Eusko Legebiltzarra eratu zen tokian egingo dute, eta saio hartan parte hartu zuten legebiltzarkideak bilduko dira bertan. Egungo legebiltzarkideak, Ganberak urte horietan guztietan izan dituen presidenteak, lehendakariak eta Eusko Jaurlaritzako sailburu guztiak ere izango dira bertan.

- EAJren Batzar Nagusia: EAJk IX. Batzar Nagusia egin du asteburuan Donostian, eta zuzendaritza berrituta amaitu du urtarrilean abiatutako barne prozesua. Aitor Esteban izendatu dute, aho batez, Euzkadi Buru Batzarreko (EBB) presidente igande honetan, Andoni Ortuzarren 12 urteko lidergoari bukaera emanda. EAJren zuzendaritza berriak astelehen honetan egingo du lehen bilera Aitor Esteban buru dela.

- Durangoko bonbardaketaren 88. urteurrena: Duela 88 urte Durangoko bonbardaketan hildakoak omenduko dituzte gaur Durangon. 1937ko martxoaren 31n Italiako hegazkinek, Frankoren esanetara, Durango bonbardatu zuten. 213 herritar hil ziren, gehienak goizeko elizkizunetan zirela.