Politika -
Koldo auzia
Genero-indarkeriagatik ikertzen ari dira Koldo Garcia, emazte ohiarekiko tratu txarren zantzuak aurkitu ostean
Ustezko indarkeria matxista kasu batean inplikatzeko moduko mezuak eta beste artxibo batzuk aurkitu dituzte Abalos kasua ikertzen ari diren agenteek. Alabaina, emazte ohiak "erabat" ukatu du tratu txarren biktima izan denik.
Agentziak | EITB Media
Ismael Moreno Auzitegi Nazionaleko epaileak Koldo Garcia Izaguirrek (Jose Luis Abalosen aholkulari ohia) Patricia Uriz emazte ohiari emandako ustezko tratu txarren zantzuak helarazi dizkio horretan konpetentzia duen auzitegiari, Garciak genero-indarkeriako deliturik egin ote zuen iker dezan.
Iturri juridikoek berri-agentziei baieztatu dietenez, 'Koldo kasua' ikertzen ari diren Guardia Zibilaren Unitate Zentral Operatiboko agenteek ustezko indarkeria kasu batean inplikatuta egon daitekeela iradokitzen duten hainbat mezu eta artxibo aurkitu dituzte enkriptatuta zegoen Koldo Garciaren dispositibo batean.
Guardia Zibilak Ustelkeriaren aurkako Fiskaltzari eta magistratuari eman zien aurkikuntza horien berri. Epaileak pieza banandu bat irekitzea erabaki zuen otsailaren 20an, eta Villajoyosako (Alacant) epaitegien alde inhibitu zen, delitu hori ez delako Auzitegi Nazionalaren eskumena eta gertakariak epaitegi horren jurisdikzioan gertatu zirelako.
Hala ere, astelehenean ustezko tratu txarren berri jakin bezain laster, Patricia Urizen abokatuak ohar bat bidali du berri agentzietara bere bezeroa genero indarkeriaren biktima izan zela erabat ukatzeko. "Elkarrekin bizi izan ziren urteetan, inoiz ez da izan genero-indarkeriatzat jo daitekeen egoerarik", azpimarratu du Urizen abokatuak, eta adierazi du ez zaiola jakinarazi "genero-indarkeriako prozedurari" buruzko informaziorik. Bere esanetan, pieza bereizi bat irekitzeko ebazpena jaso zuten, baina inoiz ez zitzaien jakinarazi gai horrengatik zela.
Bestalde, Koldoren defentsa-iturriek adierazi dutenez, ez dute jaso genero-indarkeriako delitu batengatik auzi bat ireki izanaren jakinarazpenik, eta uste dute gai hori "lintxamenduaren ideiaren barruan" dagoela, "familia bat suntsitzearen ideiaren barruan".
Koldo Garcia eta Patricia Uriz 2024ko otsailaren 21ean atxilotu zituzten Delorme operazioan, eta biak ikertzen ari dira Auzitegi Nazionalean Abalosen aholkulari ohiaren izenarekin bataiatutako kasuan maskara-kontratuen sarearen inguruan.