Holokaustoaren biktimak omendu dituzte Pragan, tartean, Angel Lekuona busturiarra

Strasniceko errauste-labearen atarian lore-eskaintza egin dute goizean, eta han, Frantisek Suchy omendu dute, toki horretako arduraduna izan zena; nazien aginduei uko egin, eta 2.200 fusilaturen baino gehiagoren errautsak gorde zituen. Eguerdian, Gernikako arbolaren kimu bat landatu dute bertan.

Praga, gaur goizean. Argazkia: Maider Beistegi — Holokaustoaren biktimak omendu dituzte Pragan, tartean, Angel Lekuona busturiarra

EITB MEDIA

publikatuta: 2025/04/15 08:54 (UTC+2)

azken eguneratzea: 2025/04/15 16:14 (UTC+2)

Bigarren Mundu Gerra amaitu zela 80 urte beteko dira irailean, eta urteurrena gogoratzeko, Pragan (Txekiako Errepublika) ekitaldi-sorta antolatu da. Horien artean, gaur holokaustoaren biktimak eta Frantisek Suchy omendu dira. Azken hori Strasniceko errauste-labearen arduraduna izan zen gerraren garairik gordinean, eta naziek emandako aginduen kontra, 2.200 fusilaturen errautsak identifikatu eta gorde zituen, emaztearen eta semearen laguntzarekin. Erresistentzia lan hori ezinbestekoa izan da biktimak aurkitzeko.

Aitortza-ekitaldiak 11:00etan hasi dira, Strasnicen, lore-eskaintza batekin. Bertan izan dira hainbat herrialdetako gobernuen ordezkariak eta biktimen senideak, tartean, Angel Lekuona busturiarraren etxekoak. Haren eta Espainiako Estatuko beste bost errepublikanoren errautsak ere Suchyri esker daude gordeta Pragako hilerri nagusian.

Lekuonaren eta beste gudari batzuen historiak 'Popel' ('Errautsa') izeneko dokumentalean jaso ditu Oier Plaza zinemagileak, eta EITBren partaidetza duen lan hori estreinatuko dute Txekiako hiriburuan, arratsaldeko 19:00etan. Aurretik, 13:00etan Gernikako arbolaren kimu bat landatu dute.

Gernikako arbolaren kimu bat landatu dute Pragan, holokaustoaren biktimen omenaldian

0:43

Anton Gandarias, Angel Lekuonaren iloba, Europa osoko artxibategietan barrena ibili da osabaren nondik norakoak bilatzen. Pirinioetan gudari aritu zen, baina preso hartu zuten Frantzian, eta orduan hasi zen busturiarraren gurutze-bidea hainbat espetxe eta kontzentrazio esparrutan. Alemaniara, Buchenwaldera, eraman zuten naziek 1.900 presorekin batera, eta gerra amaitzear zela, handik Flossemburgera.

Aliatuengandik ihesi, frogarik ez uzteko SSek milaka presorekin hegoalderantz 'Heriotzaren Martxak' abiarazi zituztenerako, Angel gaixorik zegoen jada, pleuresiak jota. Gatibuek oinez ehunka kilometro egin behar zituzten egun gutxitan. Horregatik fusilatu omen zuten, gaitzak jotako beste hainbat gatibu bezala.

Radio Euskadin egindako elkarrizketan, hunkituta agertu da Gandarias, "azkenean" lortu delako "agintariek esku-hartu" eta "biktima guztiak aitortzea". Osabaren errautsetara iritsi arteko bidea ekarri du gogora, eta gaurko ekitaldiak urteetako lanari amaiera emateko balioko duela iritzi dio.

Hau zure interesekoa bada, baliteke beste gai hauek ere izatea

Gernikako bonbardaketa Politika Gernika-Lumo Eguneko albisteak Albisteak Memoria Historikoa

Holokaustoaren biktimak omendu dituzte Pragan, tartean, Angel Lekuona busturiarra

Esteka kopiatuta