"Euskal herritarrak nazio bat gara, eta hori da Aberri Egunean ospatu beharrekoa", Estebanen hitzetan

EBBren presidente Aitor Estebanen ustez, "euskal herritarrak herri bat, nazio bat" garela da biharko Aberri Egunean ospatu beharrekoa. 

Alderdi jeltzalearen presidente gisa ospatuko duen lehen Aberri Eguna da igande honetakoa. Bezperan, Bizkargi mendira igo da Esteban, bere alderdikideekin batera, euskal herritarrei eskatzeko parte har dezatela biharko ospakizunean.

Nazioarte mailan "une zailak" eta "ziurgabetasuna" nagusi diren honetan, adierazi du "zerbait berria izanik ere", aurretik ere bizi izan ditugula antzeko egoerak.

"Gure lana mendira igo, eta gailurreratz aurrerapausoak ematea da, gure nortasuna, herria eta hizkuntza galdu gabe", azpimarratu du.