Jaurlaritzak itzalaldiagatik ezarritako larrialdi maila jaitsi du, baina alertari eutsi diote

Eusko Jaurlaritzak itzalaldi elektrikoaren arriskuari erantzuteko maila jaitsi du. Euskadi 1. mailako larrialdi-fasetik Babes Zibileko Planaren barruko alerta-fasera igaro da, hiru egunez larrialdi egoera aktibatuta egon ondoren, apirilaren 29tik.

Larrialdiko 1. fasea indarrean egon zen egunetan, LABIk (Larrialdiei Aurre egiteko Bidea, Euskadiko babes zibilerako plana) bere gain hartu zuen zerbitzu guztiak koordinatu eta esku hartzeko ardura, eta bigarren maila batean utzi zituen udalen jarduketa-planak. Etapa hori atzean geratu da orain.

Alerta-maila berriarekin, agintariek egoera elektrikoaren berri izaten jarraituko dute, eta azkar jarduteko prest egongo dira. Besteak beste, inplikatutako zerbitzuei eta herritarrei informazio garrantzitsua bidaltzea aurreikusten da, baita larrialdiei aurre egiteko taldeak puntu estrategikoetan kokatzea ere.

Gainera, protokoloak, baliabideak eta ekipamenduak berrikusten ari dira, larrialdi-fasea berriro aktibatu beharko balitz ere, maiz gertatzen ez diren baina erabat baztertzen ez diren agertokiei aurre egiteko.