Ezker abertzalea, 'denerako prest, bere iragana ukatzea izan ezik'

Pernando Barrena Batasunako buru ohiak esan duenez, ezker abertzalea "denerako prest dago, bere iragana ukatzea izan ezik". "Ezker abertzaleari ezin zaio eskatu iraganean beste jarrera bat izan zutenei arrazoia ematea; izan ere, ez du egingo", azaldu du Barrenak.

Ezker abertzalea "herri hau askatzeko borrokan egin duenaz oso harro dago", Barrenak Onda Vascan eskaini duen elkarrizketa batean egin dituen adierazpenen arabera.

“Bere iragana ukatzea” ez ezik, "beste jarrera batzuk izan zituztenei arrazoia ematea" eskatzen diote batzuetan ezker abertzaleari, Barrenaren esanetan. Haren aburuz, "ezin da halakorik eskatu, argi dago, eta, are gutxiago, biktimak izan edo ez, balorazio politikoak egin dituzten pertsonei buruz ari garenean"; izan ere, "azken finean, herri honetako beste herritar batzuk dira".

Inaxio Uriaren familiak gaur Azpeitian egin duen elkarretaratzean "ETAren hilketa guztiak" gaitzesten dituztenak bakarrik izateari buruz, ezker abertzaleak “beti” errespetatuko du biktimek eta horien senideek "nahi dutena esateko eskubidea izatea", esan du Barrenak; izan ere, "biktimek eskubide hori izan behar dute".