Atzeratu egin dute euskararen, katalanaren eta galizieraren ofizialtasunari buruzko bozketa

Europar Batasuneko herrialdeek erabaki dute astearte honetan egitekoak ziren euskararen, katalanaren eta galizieraren ofizialtasunari buruzko bozketa atzeratzea, ez dutelako lortu hogeita zazpiak bat etortzea, lege, finantza eta politika arloetako zalantzak kari. Ofizialtasuna aurrera atera ahal izateko beharrezkoa da erabakia aho batez hartzea; hau da, ezin da kontrako botorik egon, eta, gauzak horrela, gaia atzeratzea erabaki dute.

Gaur goizetik zalantzak zabaldu dira Europar Batasunean euskara, katalana eta galegoa ofizial izateko eta Europako erakundeetan erabilera ahalbidetzeko eztabaidaren inguruan, eta, azkenean, hamar bat herrialdek berariaz eskatu dute bozketa gai-zerrendatik kentzeko, Espainiako Gobernuak egin moduan. Poloniari dagokio EBn presidentetza eta eztabaidak moderatzea, eta gaia aurrerago jorratzeko erabakia hartu du.

Bozketa atzeratzeko erabakiaren ondotik, Pilar Alegria ministro bozeramaileak ziurtatu du Gobernuak Europako kideekin "lanean eta hitz egiten" jarraituko duela. Adierazpenok bozketa atzeratu ondotik egin ditu, Ministroen Kontseiluaren osteko prentsaurrekoan. Juntsen presioaz galdetuta, Alegriak ziurtatu du "konpromisoa argia" dela, eta helburua "aurrerantzean lanean jarraitzea dela", herrialde kide guztiek euren oniritzia "lehenbailehen" eman dezaten.

Azaldu duenez, Exekutiboak urteak daramatza Europako kideekin lanean, herrialdearen "nortasun eleanitza" onar dezaten, eta azken asteetan "aurrerapen handiak" lortu dira, neurri hori babesteko alde dauden herrialde kopuru "zabal" batekin. Hala ere, talde "txikiago" batek (ez du zehaztu nor) denbora eta informazio gehiago eskatu du, eta Espainiak eskaera hori onartzea erabaki du, hitz egiten jarraitzeko.

Hainbat herrialde, duda-mudan

Espainiako Gobernuak sustatutako ekimena astearte honetan bozkatu behar zen Europar Batasuneko Gai Orokorren Kontseiluan, baina hainbat herrialde kidek, tartean Finlandiak, Suediak, Austriak eta Kroaziak, lege eta finantza arloei dagokienez zalantzati agertu dira.

Frantzia eta Zipre, berriz, ulergarriagoak izan dira, eta gai horrek Espainian duen garrantzia azpimarratu nahi izan dute; Danimarkak, berriz, aurreratu du ez duela proposamenaren aurka egingo, eta Esloveniak esan du bozketa bat izatera, babestu egingo duela.

Ofizialtasunaren atea oraindik zabalik dago, hortaz. Onartuko balitz, Europako hizkuntza ofizialak 27 lirateke aurrerantzean (gaur egun, 24 dira) eta euskara, katalana eta galegoa EBko erakunde guztietan erabiltzeko eta lanerako hizkuntzak lirateke.

Araudiaren arabera, hizkuntzok erabilgarri egiteko kostua Europar Batasunaren aurrekontuarekin finantzatu behar da. Nolanahi ere, Espainiako Gobernuak proposatu du kostua bere gain hartzea. Sanchezen gobernuak ez du horren aurrekontu zehatzik eman, baina Bruselak 2023ko abenduan egindako azterlan baten arabera, urtean 132 milioi euro inguru izan lirateke (gaelikoaren esperientzian oinarrituta egin zituzten kalkuluak).