Windows 8.1 sistema eragilearen eguneratzea eskuragarri dago jadanik

Windows 8.1, Windows 8 sistema eragilearen lehenengo eguneratzea, jadanik eskuragarri dagoela iragarri du gaur Microsoftek.

Teknologia konpainia estatubatuarrak prentsa ohar batean adierazi duenez, 8.1 bertsioa 230 merkatutara iritsiko da 37 hizkuntzatan, Windows 8 kaleratu eta urtebetera.

Ordenagailurako, tabletetarako eta bi batean ekipoetarako balioko du bertsio horrek. Izan ere, Windowsek Espainian duen ataleko arduraduna den Fernando Calvoren hitzetan, "mugikortasunak, teknologia ukigarriak eta beti konektatuta egoteko beharrak" markatutako garaian gaude.

Berrikuntza nagusietako bat Windows 8 sistemak ezabatutako 'Hasiera botoia' berreskuratzea da. Gainera, pertsonalizatzeko aukera gehiago eskaintzen ditu, eta erabilera errazagoa eta familiarragoa du; izan ere, 'app' guztiak begirada bakarrean ikusteko aukera ematen du, eta Bing Smart Search erabiliz, bilaketa aurreratuak egin daitezke.

Eguneratzea bihar jarriko da salgai, baina Windows 8 erabiltzen dutenek Microsoften online dendatik dohainik deskargatzeko aukera izango dute gaurtik aurrera.

Guztira, Microsoft konpainiak ordenagailuetarako sortutako Windows 8 sistema eragilearen 100 milioi kopia baino gehiago saldu dira, enpresa estatubatuarraren datuen arabera.