Youtube, Spotifyren pareko zerbitzua kaleratzear

YouTube akordio batera iritsi da Merlinekin, mundu osoko milaka diskoetxe independente ordezkatzen dituen eskubide agentziarekin, streaming bidez musika harpidetza zerbitzua eskaintzeko.

Googleren bideoen ataria prest omen dago Spotifyren, Deezerren edo Apple Beats Musicen pareko zerbitzua merkaturatzeko. Financial Times egunkariaren arabera, "datozen asteotan" kaleratuko dute zerbitzua, eta hilero ordaindu beharreko harpidetza baten bitartez funtzionatuko du. Musika eta bideoak streaming bidez emango ditu, iragarkirik gabe, eta abestiak Internetik gabe ere entzun ahal izango dira.

Universal, Sony eta Warner diskoetxe handiekin akordioa egin ostean, Youtubek indie musika jorratzen duten diskoetxeekin abiatu zituen negoziaketak, eta azkenean Merlin taldearekin lortu du adostasuna. Merlinek indie musikako 20.000 diskoetxe baino gehiago ordezkatzen ditu.

Ekainean, YouTubek kontratua sinatzen ez zuten diskoetxeen bideoak ataritik kentzeko mehatxua egin zuen.