Googlek Picnik argazkiak sarean editatzeko erreminta erosi du

Bere blogean adierazi duenez, Googlek Picnik erosi du, argazkiak online editatzeko lehen webguneetako bat. Picnikeko erabiltzaileak bere argazkiak moztu, ukituak egin eta irudiak gehitu ditzake, eta hori guztia nabigatzailetik atera gabe egin dezake.

Gaur egun, jendeak inoiz baino gehiago igotzen ditu bere irudiak sarera. Horretarako, orain arte, erabiltzaileak bere ordenagailuan editatu behar zituen irudiak. Picnikek, berriz, edizio eta igoera prozesua bizkortzen ditu.

Horrela, Picnik Googleren erosketa estrategikoetako bat da, izan ere, doakoak ez diren irudiak editatzeko beste software batzuen lehiakide bihurtu nahi omen du Picnik. Ez ditu Photoshop bezalako programen aukerak ematen, baina erabiltzaile arruntaren beharrak asetzen ditu eta Flickr, Facebook, Picasa edo MySpace bezalako sare sozialetan gordetako argazkiak editatzeko aukera ematen du.

Oraingoz, Googlek ez du aldaketarik iragarri nahi, baina enpresaren arduradunek esan dute ezaugarri berrietan lanean hasiko direla. Horrez gain, Picnikeko erabiltzaileei erremintarekin lanean jarraitzeko eskatu diete.