Bilbon egindako bideojoko bat saritu du Espainiako Arteen Akademiak

2015eko AzPlay lehiaketaren euskal bideojoko onenaren irabazleak, Delirium Studios enpresa bilbotarraren ‘Los delirios de Von Sottendorff y su mente cuadriculada’ jokoak, Espainiako Arte eta Zientzia Interaktiboen Akademiaren onarpena jaso du.

Bideojoko horrek hamahiru sarietatik hiru eskuratu ditu, Azkuna Zentroak astelehen honetan, uzatailak 11, jakitera eman duenez. Halaber, Delirium Studios enpresak jaso berri dituen sari horiek Azkuna Zentroak urtero antolatzen duen lehiaketaren paper garrantzitsua frogatzen dutela gaineratu dute.

Izan ere, Azkuna Zentroak 5.000 euroko bost sari banatzen ditu bideojokoekin zerikusia duten lan berriak sustatzeko asmoz. Modu horretan, kategoria desberdinen bidez bideojoko originalenak, sortzaileenak eta berritzaileenak saritzen dituzte.

‘Los delirios de Von Sottendorf y su mente cuadriculada’ jokoak 400.000 euroko aurrekontua izan du eta bideojokoak garapen prozesu luzea izan du. 2010ean, AzPlay-ko lehen edizioan jokoaren lehen bertsio batek bi sari irabazi zituen. Beta bertsio honetatik aurrera Delirium Studios-ek proiektu askoz konplexuagoa garatu ahal izan zuen Nintendo 3DS kontsolarako.

Gainera, ekainean Indi Cade bideojoko independenteen erreferentea den eskutik beste sari bat jaso zuen euskal enpresa horrek egindako jokoak.

Era berean, Azkunza Zentroak AzPlay Bideojoko Independenteen Nazioarteko Lehiaketaren zazpigarren edizioa martxan jarri du. Azaroaren 7tik 24ra erakusketak, topaketak eta mintegiak izango dira sektorearen profesionalekin.