Teknologia -
Argitaletxeen industria
Amazon.es urtea amaitu baino lehen iritsiko da Espainiara
Sareko dendak paperezko liburuak salduko ditu hasieran eta ebook-ak aurrerago merkaturatuko ditu.
Erredakzioa
Amazon Interneteko denda urtea amaitu baino lehen iritsiko da Espainiara, argitaletxeen industriak adierazi duenaren arabera. Hala ere, Sareko dendak paperezko liburuak salduko ditu hasieran eta ebook-ak aurrerago merkaturatuko ditu.
Datorren irailaren 14an, Greg Greeley Amazonen Europako presidenteordeak Espainia bisitatuko du eta "iragarpen garrantzitsu bat" egiteko asmoa omen du, baina Amazoneko bozeramaileek ez dute iragarpen hori zehaztu nahi izan.
Roca Editorial argitaletxeko Blanca Rosa Rocak adierazi duenez, joan den abuztuan Amazonekin Espainian liburuak banatzeko akordioa itxi zuten. Gainera, Amazon.es uda ostean iritsiko dela aurreratu du.
Luis Solana Libros del Asteroide argitaletxeko sortzailearen aburuz, Amazonek liburu digitalen merkatuak sortzeko gaitasuna duela erakutsi du AEBetan eta Espainian orain arte horrelako merkaturik lortu ez dela esan du. Hori dela eta, Amazonekin akordioa negoziatzen ari dira.
1995ean sortu zutenetik, Amazon Interneteko denda munduan Sarean salmenta gehien egiten dituen ataria bilakatu da.
