X-gaztea maketa lehiaketa-X

X-gaztea maketa lehiaketa-X

Maketa Lehiaketa

Urtemuga

Maketa Lehiaketa, entsegu lokaletik oholtzarako zubia 25 urtez

LUZIA ZUGADI | EITB.EUS

Nazca izan da orain arteko azken irabazlea, eta EH Sukarra izan zen podiumera igo zen lehendabiziko taldea. 25. edizioa asteazkenean abiatuko da.

Gazteako Maketa Lehiaketak mende laurdeneko ibilbide luzea darama bizkarrean. 1991n egin genuen lehendabiziko edizioa, Gaztea Irratia sortu eta urtebetera. Ordutik hona, baina, izan du aldaketaren bat edo beste. Gaur egun, adibidez, bi talde edo bakarlari saritu ohi dituzte; duela 25 urte, berriz, talde bakarrak lortu zuen saria.

EH Sukarra eibartarrak izan ziren, hain zuzen, Maketa Lehiaketaren podiuma estreinakoz zapaldu zutenak. Hurrengo urtean, Sorotan Belek jaso zuen lekukoa, eta gerora iritsi zen PLT eta Zea Mays taldeen maketen arrakasta, 1995ean eta 1997an, hurrenez hurren.

Esan bezala, hasiera batean Epaimahaiaren Saria soilik banatzen genuen, baina urteen joan-etorrian entzuleen ahotsak ere hartu zuen lekua aipatu lehiaketan. Hala, 1995ean eman genuen aurrenekoz bigarren sari hori, eta Latzen izan zen garaile orduan. Urtebete geroago, 1996an, alegia, Berri Txarrak izan zen entzuleen babesa lortu zuena.

Oro har, agertokian oihartzun handia izan duten taldeak nagusitu dira 25 urteotako lehiaketetan. Mintzagai ditugunak ez ezik, besteak beste, El Columpio Asesino, Seiurte, Kerobia, Lain, Enkore, Belako eta Skasti dira epaimahaikideek azken urteotan begi onez jo dituzten taldeak.

Horri esker, oholtza gainean indartsu eta arrakastatsu aritzeko hautua izan dute harrezkero, bai Epaimahaiaren Saria eskuratu dutenek bai Entzuleen Saria lortu dutenek. Horiexen artean, aipatzeko modukoak dira, halaber, Split 77, Delorean, Kauta eta Kometa.

25 urte geroago, bide beretik jarraitzen du Maketa Lehiaketak. Dakizuenez, asteazkenean bertan ekingo diogu 25. edizioari, eta inoizko sari potoloenak daude jokoan oraingo honetan. Eskudirutan 5.000 euro hartuko ditu lehen sarituak, eta 2.500 euro eramango ditu etxera bigarrenak.

25 urteotako irabazleak, urtez urte

Epaimahaiaren Saria:

1991, EH Sukarra

1992, Sorotan Bele

1993, Psicosis / Hor Konpon

1994, 6 Nemen 9

1995, PLT

1996, Fundiziyue

1997, Zea Mays

1998, Noraezean

1999, Kafha

2000, El Columpio Asesino

2001, All Fools Day

2002, Seiurte

2003, Kerobia

2004, Kristina Solano

2005, Khous

2006, Karelean

2007, Dynamo

2008, Lain

2009

2010, Zain

2011, Enkore

2012, Belako

2013, Skasti

2014, Smoke Idols

2015, Nazca

Entzuleen Saria:

1995, Latzen

1996, Berri Txarrak

1997, Pano's Flat, Atxantatu, Debekatua

1998, Feeling Good, Splitt 77, Txarkey, Behin betiko

1999

2000, Hira, Anger, Offset

2001, 2D1, Conflict Noise, Hi! Satelite

2002, Biok, Ehiztari Beltza, Delorean

2003, Kauta, Zer, Keike

2004, Pog Mo Thon, Muted, Neu

2005, Nuke, Milkshake, Itaka

2006, Bisai

2007, Noisex

2008, Averno

2009

2010, Lorebeltz

2011, Larregi

2012, Ebony Rose

2013, Skasti

2014, Kometa

2015, Stai Zito