Albisteak
Disko berria
'A Head Full Of Dreams', Coldplayren lan berriaren izenburua
LUZIA ZUGADI | EITB.EUS
Talde britainiarrak ez du zehaztu noiz argitaratuko duten disko berria. Halere, dagoeneko iragarri dute zein izango den proiektu horren izenburua.
Coldplayk atal berria estreinatu du taldearen webgune ofizialean. "The Coldplay Timeline" atalak 1998tik gaur arte taldeak bizi izandako ibilbidea jasotzen du. Bertan, iraupen luzeko hurrengo diskoaren izenburua (A Head Full Of Dreams) ere iragarri dute taldekideek.
"Gure zazpigarren proiektua da, eta Harry Potterren azken liburuaren antzekoa da. Honekin ez dut esan nahi etorkizunean ez denik beste diskorik egongo, baina prestatzen gabiltzan lana zerbaiten bukaera da", esan zuen Chris Martinek abenduan. Halaber, Ghost Stories azken diskoarekin zerikusirik ez duela adierazi zuen.
"The Coldplay Timeline"n orain arte argitaratu gabeko bideo bat ere eskegi dute. Bestalde, 2005ean Richard Aschroftekin batera egindako entseguetako irudiak jaso dituzte. Gainera, "Yellow" bideokliparen grabazioa, 2009an Menchesterren emandako kontzertu bateko argazkiak eta "A Sky Full Of Stars" bideokliparen grabazioko argazki berriak daude ikusgai.
