Albisteak
Txutxu-mutxuak
Rihanna eta Drake kantariaren arteko musua
Dirudienez, elkarrekin daude Drake eta Rihanna. Udako bikote berrietako bat al da?
Igandean, MTV VMA sarien galan, Drake rap musikariak aitortu zuen 22 urte zeuzkanetik dagoela Rihannarekin maiteminduta. Horri erantzunez, Barbadoseko abeslariak, lotsatuta, besarkada estu bat eman zion. Alabaina, ez zuen Drakek eskainitako musua onartu.
Asteazkenean, ostera, Miamin emandako kontzertuan, rap abeslariak agertokira igotzera gonbidatu zuen Rihanna. Publikoa txaloka hasi zen orduan, eta bikoteak musu batekin eskertu zuen ikusleen poza.
Hainbat jarraitzailek taula gainean gertatzen ari zenari argazkia egin zioten, eta harrezkero ustezko harremanaren gaineko zurrumurruak indartu egin dira prentsa arrosako aldizkarietan. Gainera, kontzertua bukatu ostean, Miamiko diskoteka batean ikusi zituzten biak.
