Lendakaris Muertos taldearen emanaldia baieztatu du Iruña Rock jaialdiak

Guztira hemeretzi talde izango dira Iruña Rock jaialdiaren bigarren edizioan. Oraindik, ostera, ez dituzte aipatu festibalean arituko diren musikari guztien izenak iragarri.

Aurrerapen bezala, La Raiz, Doctor Deseo, La M.O.D.A., Narco, Tremenda Jauria, Rat-Zinger, Bourbon Kings, Kitai eta Traccion taldeen emanaldiak baieztatu zituzten antolatzaileek, eta izen gehiago heldu ziren abenduaren 18an: El Ultimo Ke Zierre, Reincidentes, Penadas Por la Ley, Attikus Finch eta Impedanzia.

Azkena, ostera, Lendakaris Muertosena izan da. Azken orduotan jakinarazi dute etxean bertan arituko direla iruindarrak maiatzaren 25ean edo 26an. Orduantxe egingo dute, hain zuzen, Iruña Rock jaialdia 2018an.

Kontzertu guztiak Nafarroako hiriburuko Zitadelan izango dira, bi agertokitan banatuta.

Sarrerak

Aipatzekoa da, halaber, dagoeneko eskuragarri dagoela bi eguneko abonamendu berezia, 40 euroan. Eskaintza hori abenduaren 31n bukatuko da.