Asteko berriak: Taylor Swiften ‘1989’ diskoaren berrargitalpena eta MTV VMA sarien izendapenak

Taylor Swift artistak '1989' diskoaren berrargitalpena grabatu duela iragarri du Los Angelesen eman berri duen azken kontzertuan (The Eras Tour biraren baitan AEBn emandako azken zuzenekoa izan da).

Urriaren 27an entzungo dugu '1989 (Taylor's Version)', artistak berak sare sozialetan iragarri duenez. Mezu berean, hainbat aitortza egin ditu Swiftek; tartean, '1989' diskoak bere bizitza hainbat modutan eraldatu zuela eta egindako berrargitalpen kutunena duela.

Surprise!! 1989 (Taylor’s Version) is on its way to you ¿! The 1989 album changed my life in countless ways, and it fills me with such excitement to announce that my version of it will be out October 27th. To be perfectly honest, this is my most FAVORITE re-record I’ve ever done… pic.twitter.com/JFYOWhBxhj

— Taylor Swift (@taylorswift13) August 10, 2023

Europar zaleek diskoaren bertsio berriaz gozatzeko aukera izango dute Swift zuzenean ikusi aurretik. Bada, 2024ko maiatzean iritsiko da The Eras Tour Europara, Lisboan hasi eta Austrian bukatuta.

MTV VMA sariak

Irailaren 13an banatuko dira MTVren VMA sariak, Newarkeko (New Jersey) Prudential Centerren, eta asteon iragarri dute aurtengo izendatuen zerrenda.

Estreinakoz, urteko artistaren kategoriako izendatu guztiak emakumeak dira: Beyoncé, Doja Cat, Karol G, Nicki Minaj, Shakira eta Taylor Swift.

Urteko abestian ere, emakumeak nagusi. Miley Cyrusen "Flowers", Olivia Rodrigoren "vampire", Rema & Selena Gomezen "Calm Down", Sam Smith eta Kim Petrasen "Unholy", Steve Lacyren "Bad Habit", SZAren "Kill Bill" eta Taylor Swiften "Anti-Hero" abestiek osatu dute aurtengo hautagaien zerrenda.