Gaztea

Gaztea

Internet

Olinpiar Jokoak, meme bidez: Sena ibaia, ezusteko garaipenak eta ospakizun bitxiak

B. F. | EITB Media

Parisen bildu diren kirolarien bideo biralek uda alaitu digute. Eskrimatik hasita arku-tiroraino, diziplina guztiek utzi dituzte irudi ikusgarriak.

  • Kim Yeji Hego Koreako tiratzailea

    Kim Yeji Hego Koreako tiratzailea

Albisteak (1)

Uztailaren 23an piztu zuten 2024ko Olinpiar Jokoen suontzia Parisen. Ordutik, garaipen eta porroten gainetik, txapelketak utzitako momentu biralekin txundituta gaude Gaztean. Horregatik, olinpiar jokoek utzitako meme eta bideo biral onenen zerrenda osatu dugu.

Kim Yeji, Hego Korear tiratzailea

Kirolariaren estiloak, arropak, jarrerak eta tiro egiteko erak sare sozialak erotu ditu. Internet konkistatzeaz gain, errekorra hautsi du 25 metroko modalitatean, eta urrea eskuratu.

Diziplina berean, bigarren protagonista bat izan dugu: Yusuf Dikec turkiarra. Kim Yejirekin alderatuta, erdi biluzik atera da txapelketara. Inongo osagarri edo betaurreko berezirik gabe lortu du urrea. Gerora jakin denez, taldekide duen Sevval Ilayda Tarhan kirolariak ere modu berean egiten du tiro (betaurrekorik gabe eta eskua patrikan gordeta), baina emakumearen estiloak ez du inoren arreta piztu.

Yaqin Zhou, bideo biral samurrena

Gimnasia artistikoan zilarrezko domina eskuratu ostean, podiumean posatzeko ordua iritsi zitzaion txinatar kirolariari. Hasieran, irribarretsu agertu zen, domina esku artean zuela. Urrezko eta brontzezko garaikurrak irabazi zuten kideek, ordea, medailari hozka egiteko keinu ospetsua egin zuten. Ingurura begiratu eta gertatzen ari zena guztiz ulertu gabe, Yaqin Zhouk ere dominari hozka egiteko hautua egin zuen.

Sena ibaian bainatu aurretik/ostean

Uretako kiroletan, Parisko Sena ibaiaz baliatu dira hainbat txapelketetarako. Berria ezagutu bezain pronto, olinpiadazaleak eta sareetako erabiltzaileak kezkatuta agertu ziren ibaian dagoen zikinkeriagatik.

Olinpiar Jokoetako antolatzaileek uraren kalitatea egokia dela argitaratu duten arren, Sena ibaian lehiatu diren hainbat kirolari gaixotu egin dira, denak hesteetako infekzioak jota.

David Katoatau, dantza bat baino askoz gehiago

Kiribati herrialdeko ordezkaria da David Katoatau haltera. Biral bilakatu da aurtengo olinpiar jokoetan, pisua altxatzean kale egiten duen arren dantza bitxi batekin ospatzen baitu.

Gerora jakin dugunez, dantza hori erakusten duen bideoa ez da Pariko 2024ko Olinpiar Jokoetakoa, Rioko 2016koetakoa baizik. Gainera, dantzaren atzean mezu bat dagoela jakin dugu: Kiribati herria eta honen beharrak ezagutaraztea.