Europa 'ekologikoa eta jasangarria' izatea eskatu du Ezker Anitzak

Ezker Anitza-Iratzarri koalizioko hautagaiek Europan eta Euskadin "beste eredu energetiko eta ekologiko bat" posible dela aldarrikatu, eta "energia garbi eta berriztatzaileen alde" egin dute.

Iñigo Martinez eta Leire Martinez Europako hauteskundeetarako hautagaiak Pasaian (Gipuzkoa) izan dira ostiral honetan, portua eta kanpo portua egiteko lanak bisitatzen. Horiekin batera Xabier Pombo zinegotzia eta hainbat militante bertaratu dira.

Testuinguru horretan, Europan "energia garbien eta berriztagarrien aldeko politikak" sustatu behar direla nabarmendu du Iñigo Martinezek. Horrenbestez, "gasarekiko eta petrolioarekiko menpekotasuna gainditzea" babestu du. Horren ildotik, Pasaiako portuak "politika jasangarriak nola egin behar ez diren" erakusten duela deitoratu du.

"Une honetan, kanpo portuko proiektua geldirik dago herritarren aurrean, baina [agintariek] izapideak egiten jarraitzen dute, eta horrek denontzako kostua izango du", ohartarazi du.

Horren esanetan, "askok uste dute proiektu hau hilik dagoela, baina aginte ekonomikoek lotan dute, goi-agintarien aldeko azpiegitura eredua berriz ere noiz ezarriko zain, bideragarritasun ekologikoa, ekonomikoa eta soziala kontuan hartu gabe".

Bestalde, Leire Martinez hautagaia Gasteizen izan da goizean, frackingaren eta energia nuklearraren aurkako informazioa ematen. "Arabak eta Euskadik energia garbia eta eredu energetiko berdea behar dute, eta posible da", aldarrikatu du.