Arrantzaleen bizitza eta ohiturak ezagutzeko aukera paregabea, Arrantzaleen Museoan

Arrantzaleen Museoak Ertzilla Dorrean du egoitza, Bermeoko Portu Zaharraren gainean. Ertzilla Dorrea monumentu nazional izendatu zuten 1943. urtean. Zaharberritze lanak egin ondoren, 2014ko azaroan berriz ireki zituen ateak, eguneratutako erakusketa batekin.

Erakusketa egonkorrean arrantzaleen eta euren familien bizitza eta ohiturekin erlazioa duten gaiak ikus daitezke: gremio-elkarteak, itsasontziak eta historian zehar arraina harrapatu eta saltzeko erabili diren teknika desberdinak. Horretaz gain, museoko lau solairuetatik bat Eusko Itsas Gudarosteari buruzkoa da, gehien bat arrantzale euskaldunez osatuta egon zena.

Ikasle, ume eta familiei zuzendutako ekintzak

Hori guztia hobeto ulertzeko, urtean zehar hainbat ekintza egiteko aukera dute adin ezberdinetako bisitariek. Ikasleek bisita gidatu parte-hartzaileak egin ditzakete ikasturtean zehar. Hiru urtetik hasita, adin bakoitzarekin gai ezberdinak lantzen dira, eta azalpenak parte-hartzaileen adinera egokituak daude. “Arrantzaleen mundua”, “Arrainak eta balea”, “Arrain espezieak, “Arrantza motak Euskal Herrian” edo “Eusko Itsas Gudontzidia” landu daitezke.

Gainera, 5 eta 10 urte bitarteko umeek, opor garaian, arrantzaleen mundua ezagutzeko aukera daukate, jokoak eta eskulanak eginez.

Bestalde, azarotik maiatzera, familiei zuzendutako tailerrak egiten dira larunbatetan. Jarduera horien helburua familiako kide guztiek (umeek eta gurasoek batera) euskal arrantzaleen mundua ezagutzea da, tailer eta jolas dibertigarrien bidez.

Horietaz gain, beste ekintza berezi asko izaten dira museoan: kontzertuak, hitzaldiak, bisita bereziak, etab.

Urria, umeentzako ekintzaz beterik

Urriaren 5ean eta 19an, Ondarearen Europako Jardunaldien egitarauaren barruan, bisita bereziak eskainiko ditu Arrantzaleen Museoak: “Errituak: Madalen eguneko jaia”. Museoan bisita egin ondoren, itsasontziz ibilbidea egingo dute, Izaro irla inguratu eta Elantxobera iristeko.

Urriaren 6an, ipuin kontalari saioa izango da Arrantzaleen Museoan: “Bertoko eta urrutiko ipuinak”. Mareak jaialdiko egitarauaren barruan dago ekitaldi hori. Urriaren 18, 19 eta 20an, berriz, museo ingurua Erdi Arora bueltatuko da; izan ere, “Bermistoria” izeneko Erdia Aroko jaialdi dibertigarria izango da Bermeoko Alde Zaharreko kaleetan zehar.

Bisita eta tailerretan parte hartzeko izena ematea beharrezkoa da honako kontaktuan:

Tl. 946881171 // arrantzaleenmuseoa@bizkaia.eus