Euskadi Irratia
Euskadi Irratia
Adolfo Muñoz, ELAko Euskadiko idazkari nagusia, 'Faktoria' saioan
Maite Artolak 09:00etan elkarrizketatuko du 'Faktoria' saioan Muñoz, eta Mikel Navarro ekonomian katedraduna izango du gonbidatu gero. Ebolari aurre egiteko txertoa ere izango dute hizpide.
Gaur, asteartea, 16:00etan zabalduko ditu ateak Xabi Larrazabalek eta Maider Segurolak zuzentzen duten 'Hiri Gorrian' saioak. Lehen orduan, erakusketen diseinuaz hitz egingo dute Rebeka Arrarasekin, eta, bigarren orduan, asteroko fanzinea egingo dute, Iruñea, Bilbo eta Baionako berri jasota.
20:00etan, Arantxa Iturbek zuzentzen duen 'Arratsean' saioan, Lander Arretxearen kultura hausnarketa izango dute, eta Alaine Agirrerekin hitz egingo dute ondoren, horren lehen nobelaren harian: Odol mamituak. Programa amaitzeko, Hesian taldeak Fran Uriasekin eginiko disko berria aurkeztuko dute: Hegalak astinduz.
Bihar, asteazkena, 07:00etatik 13:00etara zabalduko ditu Euskadi Irratiko ateak 'Faktoria' saioak. Maite Artolak zuzentzen duen 'Faktoria' albistegian, ELA sindikatuko idazkari nagusia, Adolfo Muñoz, elkarrizketatuko dute 09:00etan, eta ondoren, ekonomiaren tartean, Mikel Navarro ekonomia katedraduna izango dute gonbidatu.
Jarraian, Manu Etxezortuk zuzentzen duen 'Faktoria' magazineko lantaldeak hartuko du lekua Euskadi Irratian. 10:00etan, Bergarako kultur zinegotzia, Leire Iruin, izango dute gonbidatu, Bergarako eliza kultur etxe bihurtuko baitute. 11:00etan, ebolaren kontrako txertoa lortzeko entsegu klinikoak martxan direla kontuan hartuta, nola egiten duten galdetuko diote Eider Larrarte Txagorritxu Ospitaleko Entsegu Klinikoen Unitateko arduradunari. Eta eguerdian, berriz, Gabonetara begira hasiko dira, erakusleiho bat originaltasunez apaintzen erakutsiko baitigu Haizea Perez eskaparatistak.
16:00etan zabalduko ditu ateak Xabi Larrazabalek eta Maider Segurolak zuzentzen duten 'Hiri Gorrian' saioak. Lehen orduan, Internetez hitz egingo dute Telmo Sexmilorekin, eta, bigarren orduan, tertulia egingo dute.
Eta 20:00etan, Arantxa Iturbek zuzentzen duen 'Arratsean' saioan, Xabi Erkizia izango dute, astero legez, entzule perfektuaren bila, eta, ondoren, Joseba Irazokirekin hitz egingo dute Joseba Irazoki eta lagunak disko berriaz.
