Euskadi Irratia
Asteazkenean
Itxaso Atutxa, 'Faktoria'n
Euskadi Irratia
Euzko Alderdi Jeltzaleko Bizkai Buru Batzarreko presidente Itxaso Atutxa izango da gonbidatu nagusia albistegian. Magazinean, Gari abeslariarekin hitz egingo dugu.
-
Itxaso Atutxa. Argazkia Euskadi Irratia
Euzko Alderdi Jeltzaleko Bizkai Buru Batzarreko presidente Itxaso Atutxa izango da asteazken honetako 'Faktoria' albistegiko gonbidatu nagusia. 09:00etatik aurrera erantzungo die Maite Artolak egingo dizkion galderei.
Aktualitate politikoari buruzko analisian sakontzeko, Mikel Irizar, Iker Rioja eta Hedoi Etxarte eseriko dira mahaiaren bueltan. 08:00etako albistegiaren aurreko zutabea Ana Aizpiriren ardura izango da. Saioa bukatzeko, Koldo Almandozek ekarriko du munduari buruzko bere ikuspegi zinematografikoa.
10:00etan ekingo dio magazinari Manu Etxezortuk. Garik eta Josu Zabalak Euskaldunan emango dituzten kontzertuak direla eta, Gari abeslaria izango dugu. Bestalde, Mintzalasai ekimenera hurbilduko gara Biarritz-era.
Gainera, Klimaren alde zer egiten dugun galdetzen ari gara aste osoan, eta bihar Euskal Elkargoak indarrean jarri dituen Tranbusa, Txik-Txak autobus zerbitzua eta Aturri ibaiko Txalupa zerbitzua ezagutuko ditugu, Aritz Bidegainen laguntzarekin. Azkenik, Xebas Larrañaga artistaren lana ere ezagutuko dugu. Jende ezagunaren bustoak egiten ditu. Oraintxe Benito Lertxundirena ari da egiten.
