Gripearen txertaketa kanpaina eta euskal derbiak, 'Faktoria'n

Astelehen honetan (urriak 17), gripearen txertaketa kanpaina eta futboleko euskal derbiak aztertuko ditu 'Faktoria' saioak.

7:00etan hasiko da saioa eguneko albiste nagusien errepasoarekin. Ondoren, 8:00ak aldera, 'Albiste Faktoria' jarriko dugu martxan, Osasun Publikoko zuzendari Miren Dorronsororekin hitz egingo du Maite Artolak, aurtengo gripearen kontrako txertaketa kanpainaren nondik norakoak ezagutzeko. Nico Cuenca, berriz, Tobin tasaz arituko da. 8:30 aldera, solasaldia izango da Joxe Juan Gonzalez De Txabarrirekin, Martin Garitanorekin eta Jesus Prietorekin, eta segidan izango dugu entzungai Aieteko akordioaren 5. urteurrenari buruzko erreportajea.

9:30en bueltan, denda zaharrei buruzko erreportajea emango dugu, eta magazina hasi aurretik, Bernardo Atxagak asteroko gogoeta utziko digu.

10:00etan, Manu Etxezortuk hartuko du lekukoa. Joseba Kamio ur mineralen negozioaz arituko da, eta, jarraian, Donostiako kaiko erraldoiak berritzeko laguntza eske etorriko da Gorka sagastume. Kirol errepasoarekin eta Martin Gartziandia Gasteizko sindikoaren taretarekin iritsiko gara 11:00etara.

11:00etan, kirol solasaldia izango dugu. Bezperan Athletiken eta Realaren artekoak emandakoa sakon aztertuko dugu Beñat Zarrabeitiarekin eta Andoni Urbistondorekin. Gainera, egunean bertan jokatuko duten Eibar-Osasuna derbiari begira ere jarriko gara. jarraian, Dantzaz konpainiaren 'Harri-orri-ar' ikuskizun berria ere ezagutuko dugu. Dantza eta gastronomia uztartzen dituen ikuskizuna Danimarkan estrenatu behar dute hilaren 26an.  Fernando Saenz de Ugarte  zuzendariak eta Beñat Gereka Fleischmann Cooking Groupeko ordezkariak kontatuko digute nolakoa den.

12:00ak jota, Amaia Otazoren Ekogunearen tartea izango dugu, eta, horren ostean, Azkue Fundazioko zuzendari Iurdana Acacusok Banden Lehiaren 8. edizioaz hitz egingo du. Tania Arriagaren showarekin eta lehiaketarekin amaituko da saioa.

7:00etatik 10:00etara, piztu Euskadi Irratiko 'Faktoria'.