Miren Azkarate eta Jose Angel Iribar, ostiralean, 'Faktoria'n

Miren Azkarate eta Jose Angel Iribar izango dira, ostiral honetan, 'Faktoria' saioan. Azkaratek Donostia 2016ren balorazioa egingo du; Iribar, berriz, Sotera arraun taldeko eta Askatuak eta Baskonia saskibaloi taldeetako kideekin batera izango da, ikurrina atera zuteneko ekitaldiaz. Izan ere, ba al zenekiten Iribar eta Kortabarria ez zirela lehenak izan kirol ekitaldi batean ikurrina ateratzen?

Saioa 07:00etan hasiko da, eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. 08:30ean, solasaldian izango dira Maite Ubiria kazetaria, Felipe Juaristi kazetaria eta Nerea Azurmendi kazetaria. 09:00etan, Donostia 2016ri begira jarriko gara. Urtea amaitzen ari den honetan, kultur hiriburutzak emandakoari buruzko erreportajea entzungo dugu, eta, jarraian, Miren Azkarate, Donostiako Udaleko 2016 Hiriburutzako, Kulturako, Euskarako eta Hezkuntzako zinegotzi ordezkaria elkarrizketatuko dugu. 09:30ean,Jon Ssarasuak Hizkuntzen Foroa eta munduko hizkuntzen atlasa izango ditu hizpide. Gai horri helduta, gainera, Unesco etxeko Ana Ortegarekin hitz egingo dugu, Hizkutzen Foroaren koordinatzailearekin.

10:00etan, Manu Etxezortuk hartuko du lekukoa. Lehen-lehenik, Mikel Gartziak eta Jurdan Arretxek asteko titularren analisia egingo dute. Kirol aurrerapena egin ondoren, Urdaibai Bird Center zentroarekin bat egingo dugu, Edorta Unamunorekin hitz egiteko.

11:00etan, ikurrina hartuko dugu ardatz. Izan ere, Kortabarria eta Iribar ez ziren izan lehenak kirol ekitaldi batean ikurrina ateratzen. Santurtziko Itsasoko Ama Soterako arraunlariak izan ziren lehenbizikoak. Sokari tiraka, informazio horretara iritsi gara, eta, gaia lantzeko, gurekin izango ditugu, Jose Angel Iribar Athleticeko atzain ohia (Atotxako ikurrinaz hitz egingo du), Cesar Blanco Soterako kidea, Iñaki Almandoz Askatuak taldekoa eta Kepa Segurola Baskoniakoa.

11:30ean, Garbiñe Agiriano psikologoaren tartea zabalduko dugu, eta, jarraian, trenbide pasagune arriskutsuez Iñaki Larrrañaga lankideak egindako erreportajea entzungo dugu.

12:00etan, Nagore Telleriak asteburuan 'Amarauna' saioan izango dituzten eduki nagusien aurrerapena egingo digu. Gainera, Ane Muñozen zinema proposamena ere entzungo dugu.

07:00etatik 13:00etara, lanean arituko da 'Faktoria'.